KTP Week 2025 Guide bu zirna

Upa Joseph L. Chinzah (L) In

Dt. 03.06.2025 (Thawhlehni) zanah Upa Joseph L. Chinzah (L) inah Guide Book zirna a zan thum nan kan nei a, he hunah hian a vawi khatna atan kaihruaitu atana ruat ka ni. Thupui hawngtu atan Gloria Lalkhawngaihdawngi niin, zirlai 3-na "Sual simna leh Pathian rinna" tih kan zir a ni.

Upa Joseph L. Chinzah (L) In

Member kal kan thahnem hle a, a bikin KTP Junior lamte an thahnem hle a, hei hian hruaituteah phurna nasa tak pein kan tang lehzual a ni. Kum 2025 Week Guide Book zirna hi Kohhran Hall siamthat a nih avangin in lama hman a ni a, kum dangah chuan Kohhran Hall-ah kan hmang thin a ni.

Sawiho tur atana chhawp chhuahte chu hengte hi an ni :

1. Isua Krista ringtu, sual sim lovin a awm thei a ang em?

2. Baptisma hi sual sim chhinchhiahna, Isua rinna leh piantharna ang a ngaih a ni a, baptisma chang tawhte hi piangtharah kan ngai/ruat thei a ang em?

3. Piangthar tawh Isua ringtu hi a sual leh thei ang em?

4. Kristian Thalaite he engti zawngin nge Krista zuitu/ringtu tha kan nih theih ang? Sawiho ni se la.

Upa Joseph L. Chinzah (L) In

A zan thumna ka hruai zan hian KTP Junior lam an ding tha hle mai a, an huaisenna a fakawm rualin an thusawi a tha hlawm hle. Hetia naupang lam an rawn din mawlh mawlh avang hian upa lam leh hruaitute tan chona leh phurna nasa takin min pe a, kan hlawk tlang hle a ni. Kei ngei pawh chona leh phurna min pe nasa zual a; tin, programme kaihhruai pawh a nuam hle a ni.

Upa Joseph L. Chinzah (L) In

Pathian kaihhruaina changin hruaitute duhsakna Pathian kaltlangin ka dawng nasa hle a. KTP ka inhman tirh atangin Ephatha Sub-Committee (Kohhran Chanchinbu buatsaihtu) atangin bul min tantir a, tichuan eng engah emaw te chanvo min pe ve zelin, phak tawk tein, tling lo tak chungin kan ti ve zel a ni.

Kum 2025, february ni 2-ah Executive Member atana thlan ka ni ve a, hemi zan hian Rev. Vanlalmalsawmdawngkima'n Biak Inah tawngtaina min neihsak a ni.

Executive Member ka nih hma hian Mission pual fehchhuah Dt. 14.07.2023 (Pathianni) @1:30 pm Kohhran Hall-ah kaihhruaitu (Chairman)-a ruat ka ni a, thalai inkhawm Biak Inah Dt. 21.07.2023 (Zirtawp zan) ah a vawikhat nan tanna hun ka hmang bawk a ni. Kohhranpui thawhlawm chhiartu atan kum 2023, July thla chhung ruat ka ni a; tin, Sunday School, Junior Department-ah hian kum 2023, 2024 leh 2025-ah zirtirtu atana ruat ka ni bawk.

Executive Member ka nih hnua KTP thalai inkhawmnaa chair ka lak hmasak ber tum chu Dt. 13.06.2025 a ni a, ka thusawi hmasak ber chu Dt. 29.08.2025-ah thalai inkhawm Biak Inpuiah a ni. Pathian min hruaina hi ka tan a ropui hle a, kohhran bel mumal lovin thangkhat lian zet hun ka hman hnuah a mite kaltlanga rawngbawl ve theihna hun leh hmun min buatsaihsak hi ka tan a hlu em em a ni. Amaherawhchu, Pathian leh ka rawngbawlpuite hmaah tlin lohna leh fel lohna tam tak nei chungin insit tak leh inthlahrung tak chungin ka kal ve zel a, mawhphurna hlen theih loh changte hian min tichau thin a. Inthlahrunna leh insitna a lian em em thin a, chuti chungin Lalpa a tha a, min hruai zel a ni.

Kum 2025-a KTP Week puala Guide Book zirna chu a hlawhtling hlein ka hria a, mimal ina kan zir thin avangin lam hla deuha kal tumte pawh a awm a; mahse, kan kal kim tha thei hle mai a ni.