RAMBUAI LEH MIZORAM

Mizoram khawvel a awm ve chhung leh mizo hnahthlakte an mang hma loh zawnga mizote thinlunga riak reng tur chu rambuai kha a ni. Mizo National Front (MNF) chuan kum 1966-ah India ram atanga Mizoram inlak hran tumin independent an puang a. Kum 20 chhung, Mizoram chu rambuai a ni ta a. Rambuai lai chanchin hi keini thangtharte tan chuan hmanlai a chang tawh a, kan pi leh pu te leh kan nu leh pa te min hrilh chin chu kan hriat theih a ni a. He hun laia a taka hmalatute leh a tuartute thawkhawchang leh an lehkhabu chhuahte atangin eng emaw chen kan hre thei bawk a. Chung kan hriat ve theihna kawng hrang hrang atanga teha kan rilru luahtu ber chu tawrhna thuthang a ni.

Dan pangngai angin 1966 kum tirah chuan khawtlang inawpna leh rorelna chu a kal chhova, thlawhhma latute leh sikul naupangte pawhin an nitin nunphung pangngai zawhin hun an hmang mek a. March ni 1 a lo thlen meuh chuan MNF in Independent an puang ta mai a, Mizoram chu a rambuai a lo ni ta a ni.

MNF hian chhan hrang hrang avangin Independent hi an puang a. Chung zinga langsar zual chauhte chu han sawi ila. Assam hnuaia District Council kan nih laia min enkawl dan te, Mautam laia tam kan tawrha min chhawmdawl dan that loh avang te, Politics thila lungawilohna hrang hrang neih avang te leh MNF Party-in India sorkarah thil phut a neih te a hlawhtlin tak loh avang te in he buaina hi a inmung tan a ni.

Kum1958-ah Mizo Culture Society din a ni a. Mautam intan chhoh lai velin 1959-ah Mizo Culture Society chu Mizo National Femine Front ti a thlak a ni a. 11^th October 1961-ah Mizo National Front din a ni. 22^nd October 1961-ah MNF Party hruaitu thlan a ni a. President atan Laldenga, General Secretary atan R. Vanlawma leh Treasurer atan Rochhinga te thlan an ni. An thil tum lian ber chu ‘Mizoram leh Zofate tana zalenna’ a ni a. Ziaka an dah danah chuan “Ram rorelna chungchanga mahni duhthlanna sang ber (Political Self-Determination)” tih a ni. Mizo National  Volunteer an din a, MNF Party dinna hmun apiangah Volunteer chu din zel a ni a. Tleirawl leh rawlthar, nula leh tlangval, pavalai deuh chinte chu Volunteer-ah hian an inpe zut zut a. Kum 1965 laihawlah phei chuan Volunteer-a tel ve lo nih chu thalai tan chuan thil zahthlak a tling thei hial tawh a ni, an ti. Uniform an nei a, Party thil pawimawhah an duty thin a. Tin, Volunteer ho hian sipai lam (Parade) pawh an zir tel thin.

MNF in Independent an puannaah hian Pu Laldenga, Mizo hnam Pa an tih, MNF President leh midang 60 zet hming a chuang a. Mizo Hnam Sipai (Mizo National Army) chu Mizo Pasalthate hming chawiin Battalion eng emaw zah din a ni a – Taitesena Battalion, Khuangchera Battalion, Lalvunga Battalion, Chawngbawla Battalion, Saizahawla Battalion, Vanapa Battalion, Zampuimanga Battalion leh Joshua Battalion te an ni. Hawrawp hmasa ber zel lain a sawi awlsam nan battalion hming hi kaihtawi a ni thin. A tirah tak chuan Joshua Battalion hian he hming hi a pu lo va, Manipur-a Zohnahthlak te awmna niin, Run Battalion tih a ni phawt a, chumi hnuah Tinthawnga leh Enzakhupa hming an pu leh a, East Pakistan an thlen thlak hnuah Bible Joshua hming chawiin siamthat a ni, an ti.

Tichuan, Mizo Hnam Sipai (Mizo National Army), Volunteer an tih thin te leh India sipate chu March 1, 1966 atangin an indo tan ta a, he indo hun chhung hian a awh rei hle a, kum 20 chhung zet a awh a ni. Indo hunchhung hi ‘Rambuai lai’ tih a ni a. Kum 1966 hi ‘Buai kum’ tih a ni bawk. Kum 1965-ah chuan Mizo hnam thlipui tleh chuan Mizoram a tuam chhuak vek tawh tih theih a ni a, MNF Slogan – ‘India mi kan ni lo’ tihte, ‘Mizoram Mizo Ta’ tihte leh ‘Thudikin bawih a ban ang che u’ tihte chu Zoram mipute a al hneh hle tawh a. Thalai tam zawkte chu Motor-a inbeng khat ten tawnin “India mi kan ni lo, Mizoram Mizo ta” tiin an au rual thup thup zel thin a ni. Hetih vek lai hian MNF Independent Movement hi a tir phat atangin Mizo mipuite zingah a thlawp leh thlawp lo an awm ve tho a ni.

Feb.28, 1966 zanah Mizoram zalenna sualtute chu Pu C. Rochhunga In, Mission vengah Executive Committee an thukhawm a. Chutah chuan India sorkar leh Mizoram inzawmna zawng zawng chu an chhu chat a, zan lai dar 12 leh dar 1 inkar Zero Hour-ah Mizoram Independence an puang ta a. An puan zawh rual hian hmun hrang hranga Mizo National Volunteers lo inralring tawh sa te chuan Lunglei, Champhai leh hmun pawimawh dang zawng zawngte chu an la nghal a. Armed Force Special Power Act, 1958 hmangin Mizoram chu Rambuaiah puan a ni ta a ni. March 3-ah Aizawl khawpui chhunga Assam Rifles chu an hual bet leh a. Aizawl-a Assam Rifles te chuan SOS Message India sorkar hnenah an thawn ta a, an Message India sorkarin a han hmuh velah chuan a la thutak hle a. Jet Fighter a rawn tir a. Chung Jet Fighter te chuan Aizawl khawpui chu an kap alh zuai zuai mai a, Aizawl khawpui chu senmeiah a chang ta a. Nunau naupang thlabarte chu mangang em em in an sahimna zawngin daipawn lam panin an tlanchhe nguah nguah a, kawr ruam leh luidung hniam lai nia an hriat te chu an bel chawn chawn a. In lum chhuahsan duh lova, lo tawm te chu India sipaite chuan an man khawm a, an sawisa a. Quarter Quad-ah a then an khar khip a, a then Aizal District Jail-ah an ek beng a. A thente chu Silchar, Karimganj, Shillong. Guwahati leh Nowgong Special Jail lamah an thawn liam zung zung bawk a. Armed Force Special Power Act 1958, chu hleihluak takin mizote chungah an hmang a ni.

Mizoram khawpui ber Aizawl chu India sorkar-in Jet Fighter hmanga March ni 5-a a beih thu-ah hian inhnialna a awm thin a, thu inchuh a awm tlat a. Chu chu Aizawl khawpui Bomb a nih leh nih loh thu-ah a ni. India Jet Fighter-in Aizawl a beih lai vela Indian Air Force-a Mizo Commissioned Officer awm ve, Wg.Cdr.(Rtd) Lalzawma chuan, “Jet Fighter leh Bomber ten khatih laia bomb an hman thin kha 250 Pounder, 500 Pounder, 1000 Pounder, etc. te a ni. Hetiang hi Mizoram beih nan hman a ni lo. Chuvang chuan “Aizawl Bomb” a ni tih hi thil dik lo a ni. Aizawl beitu Jet Fighter te ralthuam hman kha 60 MMRP (Rocket Propelled) a ni a. Hetiang Rocket hi tunah chuan Obsolete (Thil hlui) a ni tawh. Tin, FG (Front Gun) Machine Gun ti ila, kan hrethiam mai awm e, hengte hi hman a ni. 60 MMRP aia lian hman a ni lo, Bomb hman a ni lo.” tiin a sawi a. He thu hi Media lam atangte in mi hrang hrangin an chhang nasa hle a, Aizawl Bomb ngei thu an sawi ve thung.

March ni 5, inrinni tukah hian Khatla an kap a, Khatla Bazar phei a alh nghal duai duai a. Armed Veng leh Republic Vengte pawh an kap a. March ni 6-ah Dawrpui phei lam an bei leh a ni, tiin an sawi. Tin, Aizawl khua chauh hi Jet Fighter hmanga beih a ni lo va, khaw thenkhat pawhin beih an tawk ve tho a ni.

Keini thangtharte chuan engti takin nge kha ni-ah khan Jet Fighter khan chet a lak kan hre ve thei lo va, Aizawl khawpui erawh senmeiah a chang ngei a ni tih thu chu kan hriat dan a ni. Chuvangin ‘Bomb’ leh ‘Bomb lo’ tih vela buai hian engtiang chenin nge Mizo mipuite pumkhatah a siam ang a, ram leh hnam hmangaihna rilru engtiang takin chawk tho ang maw, tih hi zawhna a ni a. Pa fing pui pui nia kan ngaihte inhnialna ringawt hian thangtharte min fuih thar zo ngut dawn em maw ni?

Pi putena ‘Vur tla’ an tih pawh ‘Dai khang alawm’ tia sawi duh thangthar lehkhathiam inti te hian, Jet Fighter in Aizawl khawpui a beih ni kha engtin sawi ve ang maw? A hunlai hre phakin lo piang ve tawh pawh ni ta ila, he thu inchuh hi a awm tho ka ring a. Kan hriat phak ve miau loh avangin hriat thiam a har a. Engti pawhin lo bei se la, he ni Mizote thinlunga riak reng tur a ni tawh hrim hrim a ni.

He ni March ni 5, Aizawl khawpui Jet Fighter-a a beih ni hi MZP chuan ‘Zoram Ni’ tiin hun rei tak atangin a lo hmang tan tawh a. He thu-ah pawh hian mi tam tak ngaihdan a inchen lova. Mi thenkhatin an thlawp viau laiin mi thenkhat thungin tul an ti lova, thu a hrang nuaih mai a ni. ‘Zoram Ni’ hi 2008 atangin thian zaho intelkhawm leh MZP tangrualin, “Mizoram Bomb-a beih ni” hriatreng nan an hmang tan a, MNF sorkar lai a ni a, Vanapa Hall-ah hetih laia Chief Minister, Zoramthanga khuallianna hnuaiah hman a ni. Kum 2009 khan I&PR Auditorium-ah a vawihnih nan hman a ni bawk. Tum hnih zet hman a nih lai hian Mizoram chhunga Political Party leh NGO atanga dodalna thawm hriat a ni ngai lova. 2010 kumah a tum thumna atan ‘Zoram Ni’ chu hman leh tum a ni a, hetih lai hian Chief Minister, Pu. Lal Thanhawla chuan hemi hmang tura MZP-te sawmna chu a hnawl a, amah leh a Party mite tan telna chi ni lova an hriat thu ziakin an hrilh a. Heng hun laia, MZP President, VL. Kroshnehzova chuan, lemziak intihsiak naupangte tana an buatsaih tak vang leh ‘Nuai chimih’ tih tawngkam chu sorkar helh ber a nih hriatthu a sawi hial a.  Tin, “Mizo History-a thil thleng lian ber, India Sorkarin a mite chunga a hmang ngai loh hmanna a ni a, min beitute rilru kan ngaihtuah lo a, kan tawrhna ni hi hnam tan rualna leh hnam hmangaih tharna ni atan i hmang ang u kan ti a ni mai a ni a, Mizo zawng zawng an leng vek a ni,” tiin a sawi bawk a.

A tira he hun hmanna tura an ruat lawk, I&PR Auditorium chu a rem vek tawh hnuin Sorkar lam atanga hman a rem leh tak loh avangin thulh leh a ni a, Central YMA Hall, Tuikhuahtlangah an sawn leh a. Tin, MZP huaihawt inziahsiak Result puanna leh lawmman semna hmuna sikul naupangte tel tir lo turin sikul Principal leh Head-te chu Mizoram sorkar Education Department chuan a hriattir bawk a.

Heti ang vel hi a ni a, ‘Remna Ni’ hman chungchangah pawh hian ngaihdan a inchen lo zul a, tha ti leh ti lem chuang lo an kat nuk a. Keini thangtharte tana ngaihdan mawl mang tak lo lut nghal thuai chu ‘Party Inbeihna leh Politics-a inchirhthehna’ tih vel hi a ni a. Tin, ‘Zoram Ni’ tih hrim hrim hi Mizorama Political Party piang hmasa ber, Mizo Union lo pianchhuahna ni 9^th, April hi ‘Zoram Ni’ tia vuahin Dist. Council Office te leh Council hnuaia sikul zawng zawngte pawhin he ni hi Holiday atan an hmang thin a. Kum a kal zel a, a hnuah chuan Pu Hrangaia hote niin an sawi, chumite chuan ‘Mizo Ni’ ti a vuahin, an hmang thin a, a ni tak pawh hi hriat zui a ni lo va. Hei pawh hi a zuihral leh ta a ni.

Buai hunchhung hian India sipaiten in tam tak an hal a, buh in te, chhek in te an hal a. Biak in te, Sikul te, mimal in te an luah lui a, man pe lovin Ar te, Kel te leh an sa ei duh apiang manin an talh a. Hmeichhe pawisawilote manin Camp-ah te an hruai a, an pawngsual bawk a. Civil mi, MNF nilo tlangval leh pa te manin an hna an thawh tir a, an nghaisa a, an kut leh ke-ah te tawnin Vawk rawh angin meikhu ten an ur a. Che thei lova phuar betin an mitah hmarcha rawt te an tat a, a letling ten banah an tawn bet a. MNF ni lo pawh, ‘MNF i ni’ tiin hmun leh hmunah an kap hlum bawk thin a, a rapthlak takzet a ni.

Khua an sawi khawm a, khaw pali, pangate khaw pakhatah an khalh khawm a. Khua chu hlawh nei lovin hnatlangin an hungchhuak vek a, a remchang laiah Gate siamin sipai an duty a; khawchhunga zana duty-te hian MNF-in an rawn kah lohna tura tih ni awm takin, an mahni sipai zingah Civil mite duty turin an hruai a, sipaite hian an himna tur an ngaihtuah ni awm tak a ni.

Heng hun, a bik takin kum 1966 atanga 1975 chhung hi rambuai pik zual lai a ni a. “Sipaiin an man a, an sawisa a, an kaphlum, an in-ambush, Curfew an puang, Movement Permit sipai leh A.O (Administrative Officer) hnenah lak a ngai, Identity Card, CID, kawku, Bari Gate, Duty, Atta, Ration, Helicopter, Parachute, LMG, Armour Car (Tank), Shaktiman (Sipai Motor lian), Jonga (Sipai Motor te), Capt., Major, Post Commander, Sipai Ui fing, Jet Fighter, Pu Laldenga, MNF, Volunteer leh Independent” tih te hi tawngkam hman lar tak te an ni.

Rambuai lai chanchin ziaktu pakhat, Pi Rebeki, Dawrpui Vengthar chuan a lehkhabuah hei hi a ziak a - Rambuai lai hian khaw thenkhatah chuan hmeichhiain lo lam an buaipui deuh ber a, mipa chuan hna an thawk hlei thei meuh tawh lo. Mizo sipai leh vai sipai hlauvin an tihna lam lamah an kawi an kawi ringawt tawh mai a ni. Kum 1968 kumah Aiduzawl-paho zawng zawng chu biak inah India sipaiin an khungkhawm a, nunau chu biak in thlang liamah an khalhkhawm a. Dam lo kal thei hlawl lo leh tar chak lo bak chu an khawm vek a. Hmeichheho chu sual tumin an pawt phar nasa hle a, nulate chu nula anga awm ngam lovin mi fate an puaksak a. Mipa biak ina an khungkhawmho chu biak in thutthleng zawng zawng chu pawnah an thiar chhuahtir vek a, chhuatah chuan an bawhkhuptir a, an hnungzangah chuan an vaw hrep a, an hnungzangte chu a duk chur a. Pakhat phei chu a hmunah a boral nghal a. Vai sipaiho chuan khawtual mi te phum pawh phal lovin tlangah pawnlang takin an phum a, vai sipai kal liam hnuah khaw mite’n thlanmualah an phum tha leh chauh a ni.

Kum 1968 March-ah chuan Pamchung khua, in 60 vel awmna chu Tualchengah khawm a ni a. Pamchung hian hemi kum hian buh an ngah hle a. India sipaite chuan Pamchung buh chu Tualchengah phur chho turin, Tualcheng mipui, Pamchung mipui leh Selam mipuite chu chhangchhe nu lamin an tir a. Lehlang tur an ni a, a thente chu an let hman a. Mahse, India sipai Kumau Regiment an lo thleng a. 1968 kum tir January thlaa India sipaiten Pamchunga an lo kal changa an awmna tur in lian tak an saktirah chuan mipuite chu an hreng vek a. Hmeichhia nausen pawmhote chu in hranah an dah a. Mipa zawng chu an in sakah chuan an dah vek a. Hmeichhia nausen pawmte chu an tap zankhua hlawm a. Zan a lo nih chuan India sipai Kumau Regiment te chuan an puakrang chuan inchhunga mipa awmho chu an kap chiam a. Thi vek awm tak an nih laiin an thi vek lo va, damchhuak an awm ve a ni.

Khaw thenkhatte chu India sipai kuli-ah an tantir a, hreawm an ti thin hle a, tumahin an hnial ngam si lo va. Khaw thenkhatah chuan India sipaiten an khua an luhin tual zawlah an khal khawm a, nausen atanga tar thlengin chaw pawh ei tha fum fe lovin an awmtir a, an tui a hal pawhin tui in tura ina luh pawh an phal lova, nilengin tual nisaah an awmtir a, riltam leh tuihalin naupang leh tar te pawh ni se an dotir nileng thin. Tin, khua an halsak nasa hlawm hle bawk. Sipai hlau reng rengi an khawsa a, heng hunlai hian Zoram hmun tinah Mizo ngei kawktu an awm ve bawk a. Chung kawktute chu vai sipaiin an kalna apiangah an hruai a, a chang phei chuan puanin an inkhuh a, tualchhung mi an kawh zeuh tawh chu vai sipaiin an man a, an sawisa hrep zel a, a then an sawisa hlum a, mi eng emaw zat ramtuileilovin an awm phah a ni.

Kum 20 chhung zet ram a han buai meuh chuan nunphung a khawlhkhang hle a. Zoram hmun tinah tawrhna thuthang a vak vel a, patling na tuar rum ri leh nu nau thlabar mangang au rawl chu a hriat tur a awm reng a. Mizo mipuite chu tuboh leh dolung karah an leng a. Vai sipai an hlauh rualin MNF sipaite pawh hlau tawk an awm a. Kha Independent Movement kha mizo mipui zawng zawngin an thlawp vek lo va, chuvangin MNF lam hlau pawh kha an awm ve tho a ni. Thisen tam tak a luang a, hmeichhiate an him lova, pawngsual an tawk nasa a. Chumi avang chuan nulate chuan mi naute an pua a, nu angin an khawsa a. An hmaiah belmangte intatin thawmhnaw chhe deuh an inbel a, bawrchhawr takin an awm lui thin. Hei hian vaiho lakah an nulatna an thup dan a ni. Tin, hmeichhia mahni chauhvin an tla ngam lo hrim hrim a, a rual leh a huho hlirin an awm khawm thin a. Hmeichhe mal tlat leh tla fal chu vai sipaiin an hmuh chuan an buan nghal mai thin a, an zuam bik a. A huhova an awm a, mizingah an awm chuan vai sipai pawh chu an tim a, an zuam loh phah ve deuh a ni. Mahse, a pawngpawrh fal deuh chuan mi zing atang pawhin hmeichhia leh nulate chu an pawt chhuak lui tho thin. He hun lai hian nula chauh an him lo a ni lo va, nutling leh pawmlai nei chenin an him lo vek a ni.

Khawkhawm tuartu pakhat chuan, “Ka duh ber chu thih a ni mai… Kan awmna Grouping Centre piah, daiah kalin Pathian hnenah ka va tawngtai thin a, ka nunna la turin ka dil thin. Khang laia ka duh ber chu thih a ni tawp,” tiin a sawi a. A rapthlak takzet a ni. Dam pawh thlahlel zo tawh lo khawpa chanchauva mihring han khawsak mai chu ngaihtuah thui ngam pawh a ni lo hrim hrim. Zoram Research Foundation (ZoRF) te buatsaih, ‘International Seminar on Grouping of Villages’ Rambuai laia khawkhawm chungchang zirhona neih atanga kan lo hriat ve atang ringawt pawhin a hrehawm turzia kan hre viai viai thei a; mahse, ngaihtuah leh sawi mai aiin a taka tawn ngei chuan a dan a tidang daih zawk ngei ang.

Tin, Aizawl khawpui Jet Fighter hmanga beih a nih avang khan Mizo Zirlai Pawl (MZP)  Gen. Hqrs. Chuan UPA Chairperson Sonia Gandhi hnenah Memorandum an theh lut a, 2010 kumah a ni a. Central sorkar chu Aizawl khawpui Jet Fighter hmanga beihtir an nih avangin ngaihdam dil turin an phut a ni. Central sorkarin ngaihdam a dil a nih chuan he ni a vanga Mizote thinlunga ser nung awm reng chu a ziaawm deuh an beisei thute pawh he Memorandum-ah hian an tarlang a. He thil hi tihawm tak a ni a, ram hmangaihna thinlung pu tan chuan hetiang em hi chu a lutuk mah mah a ni. NSCN ten Nagaland Independent an sual a, ULFA ten Assam tan, PLA ten Manipur tan, NLFT ten Tripura tan Zalenna an sual theuh a; mahse, Jet Fighter hmangin beih an ni lo.

Kum 20 chhung zet, Mizoram chu ‘Rambuai’ a nih hnu leh, MNF-ten India ram atanga Mizoram inlak hran tuma Independent suala an rammut hnuah, June 30, 1986-ah Memorandum of Settlement ziah a ni a; inremnaah chuan MNF President, Laldenga, Union Home Secretary RD Pradhan leh Mizoram Chief Secretary Lalkhama ten hmin an ziak a ni. He inremna thuthlungah hian, MNF rammute tana inbenbelna leh chhawmdawlna pek tihte, Mizoram hnena State dinhmun pek tihte, University hranpa neihte leh State mala High Court neihte a tel a ni.

Tichuan, August 2, 1986-ah MNF sipai rammute an lo haw a, an vaiin 550 zet an ni a. Luangmual ‘Remna Run’-ah thla hnih an awm a, sorkarin inbenbel nan Rs 20000/- a pe hlawm a ni.