Kungpui a tliak ta!

Ka pi, F.Zakungi, kum 84 (1933-2016) chuan he khawvela a nunkawng bumboh, harsa leh țițoh tak chu January, 09, 2016, tlâi lam 3:50 ah hnutiang chhawnin a chhandamtu hnênah min chawlhsan ta. Amah hi mi nun-tlang (straightforward) tak mai a ni a, lem chan hi a thiâm hlawl lo. Chhûngkua khâikhawma khâiding bertu a ni a, chhungkaw innghahna ban pui tak meuh a ni. A bulah chuan kan him a, kan hlim thin.

A fa la dam te

Amah avang hian tun dinhmun te pawh hi thleng ve thei niin ka inhria a. Pawl 6 - 12 ka zir chhung zawng min enkawl seilian a, duat takin min enkawl a ni. Kan sikul hian chawlh kan nei tam lo va, kum khatah thla thum tha chauh chawlh a awm. Chutiang hunah chuan phur takin a kiangah chuan ka haw ve thin. 

Ka pi hi mize dangdai tak a ni a, a huat zawng leh lawm zawng thilah pawh ri phawng phawng chi a ni. A tawngkam te hi a hraw thei em em a, lawmna tur lamah chuan a lawmawm a, zahna tur lam thilah chuan zahthlak duh tak a ni. Mi a han fiamte hi a dim lo thei em em a, a chutih vang erawh chuan tu pawhin an nel thung. Thup tit tet hi a neih loh avangin a rilru hi kan hre tlang thei thin. Tumah a huphurh ngai lova, inleng te biak chhiat a nei ngai lo. 

A chenpui a tu leh fa te

A fapa Hmingthanzuala leh a tunu (Hmingthanzuala fanu) Tetei

A fanu Helen Lalsangliani te chhungkua

A fanu Lalromawii te chhungkua

Thian kawmngeih em em a nei a, engtik lai pawhin an inzui chawt thin. Chu a thian kawmngeih em em leh a thiantha ber ni bawk chu pi Hmuaki a ni. Ani chu lo lam hna nei an nih avangin kar tluana ram lama riah te lo tul thin a. An tul zual chang phei chuan an inhmu lo rei ve thin hle. Chutiang hunah chuan ka pi hi a khawhar a zual em em thin a, a khawhar hnem nan lehkhaden leh checker te kan khelhpui thin.

A thiannu pi Hmuaki

Pathian malsawmna dawngin tu leh fa duhawm tak tak a nei thluah a; tin, mitin ngainat a nih avangin hmangaiha duhsaktu pawh hmun tinah a nei. Inleng tumah huphurhna mitin a melh ngai lo. Tin, a chapo lo em em a, thil tihsak te hi a nuam em em a, ka duh ang erawhin thil tam ka tihsak hman lo va, a pawi ka ti takzet a ni.

A nau Lianhrima te chhungkua

A tu leh fa te

Ani tel lo chuan chhungkaw khawsak a buai zova, a tu leh fa - hmun hrang hranga awm te kan inpawhna leh inzawmna te hi amah hian thui takin a hril a ni. Khua a lo rei ang a, ani tel lo hian engtin tak inpawh thei zel ang i maw! A la sarhu em a, engtiang takin nge a hmun ruak hian nghawng a neih dawn tih pawh hriatthiam a har a, khuareiah kan la hre chhawm zel ang chu!

Pu Manga te chhungkua leh nu Thangpui te nu fa

Lalhrilliana

Mi hriat hlawh tak mai a ni a, a vui niah pawh mi an thahnem hle. Rin phak bakin mite pawhin min tawrhpui ve a ni tih a hriat.

A chak loh zual fe tawh hnuah chauh min hrilh a, a dam loh thu hi chu ka lo hre sa tho na a, chuti vut vuta tha lo chho turah ka ngai lem lova. Phone atangin ka be thin a, ka ngaihven reng tho a ni. Tichuan, a zual thu min han hrilh tak thutah chuan mangang takin rang takin Serchhip ka pan nghal a, ka va hmuh chuan min hre thei tawh tlat lo! A tawng thei tawh lova, a cher em em a, khumah a chahthlak hun nghakin an lo  mut hi a ni ber tawh a. Ka thlen thu an han hrilh a, ka hming lama an han hrilh te chuan a buai em em a, thei leh thei lovin a rilru a seng ve a, a hah phah em avangin  ka be ngam ta lo a, a en pawh ka en hlei thei lo, ka lainat a ni.

A natna hi cancer a ni a, chhel takin tuar tang tang mahse a hneh ta ngang lova. January, 09, 2016, tlâi lam 3:50 ah min kalsan ta a ni.

A nau Lianhrima

Ka nunah hian ka tana mi pawimawh zual bikte hming han sawi dawn ila, ani hi a hmasa berte zinga mi a ni ve ngei ang. Chuvangin ka tan hian a pawimawh em em a, rilru na leh hrehawma ka siamna te pawh a awm ngei ka ring a, mahse, ani chuan min ngaihdam ngei ka ring. 

He leiah intawng tawh dawn lo mah ila; nakinah vanah kan intawn leh ngei ka beisei.

Heti maia a liam hi kan la tiam lova, a na kan ti. "Lo kir leh rawh," tiin ko lawm lawm mah ila, Zion khawpui mawiah a chhandamtu fakin lei hrehawm ngai lovin a leng tawh thung a, hei chauh hian min thlamuan a ni. Muang takin chawl ang che aw, ka pi.