Private School-a ka in hlawh ve thin laiin Electric Guitar man tlawm te hi ka lei ve a: mahse ka kawl rei lo khawp mai!
Pawl sawm pakhat kan zir laiin Manipur lam mi hi Chemistry Subject la turin an lo post a. Mi chut tak mai hi a ni nain rin loh deuhin guitar a lo thiam hle mai a, Computer pawh a lo thiam hle mai a, Computer Instructor atana appoint a ni hial a, a chhe siam lam thlengin a lo thiam a ni.
Tlai lam hi Game & Sport hun a ni a, a thenin computer room an pan a, chutiang zelin music ngaina ten music room an pan mai thin. Kei erawh chuan kan dorm chhak tlangah guitar ka perh thin thung.
Tlai khat chu dorm chhaka guitar ka perh laiin kan chemistry teacher chu ka bulah a lo kal a. Guitar perh min dil a, rin ai daihin a lo thiam kher mai! Rock Music kan ngainat lai a ni a, kan hla hriat ve ho kha chu a lo perh thiam zel mai a, a solo nen lam a lead thei bawk a, a mak ka ti kher mai!
Tichuan, thianhoin a quarter-ah remchang hmasa berah kan leng a, GNR - Sweet child o'mine introduction kha min zirtir ve a, kan tuipui chho ta viau mai a ni. Guitar Tab chhiar dante min zirtir a, kan hla duhzawng tab kan zawh thinte chu question paper hnung lamah min print sak ve thin. Ka note book hnung lamah hian ka hla duh tab te chu internet-a mi enin ka ziak nasa thin hle.
Ka inzir thiam hmasak ber chu "To be with you" Mr. Big solo a ni.
Vawikhat chu kan thiannu function-ah lam tura ka duh em avangin ka zai ve tawp tawh. "I zai phawt chuan ka lam ang" a tih miau avangin. Chuta ka hla sak chu Greenday hla "Macys day Parade" kha a ni. Ka thianpa nen "Ka perhkhuang zaitin thiam" tih kha hmin request tlat avangin function-ah kan sa ve tawh bawk.
GNR, Saigon Kick, Skidrow leh Tribal Power hla te hi kan sa nasa ve thin hle.
College kan rap chho ve a, thian tharte ka chhar chho ve zel a. Ka thiante nen chuan kan tui zawng a lo inang phian mai a. College Beat Contest-a tel kan duh tlang hlawm a, kan class hmeichhia zai turin kan hmin thei hlauh a, intihsiaknaah chuan hming kan thehlut ve ta ni.
Tichuan, kan Jam ta tlauh tlauha Paramore hla "Ignorance: tih kan thlang a, kan phur tlang hle. Kan band hming atan kan vocalist phuah "Rachis" tih kan hmang a ni.
Beat Contest ni chu a lo thleng ta. Mipui hmaa kan vawikhat perform na tur a nih vek hlawm avangin kan zam hlawm khawp mai. Kan hun a thleng ve ta ngei a, stage-ah min ko ta. Mipui chuan min lo lawm thiam kher mai! Stage-ah kan ding ta; mahse, vanduaina kan tawk ta tlat mai le! Sound chiangkuan loh avangin kan perform nghal thei mai lo tlat.
Zam tawh sa nak laiin Sound buaipui chhung chu minute tam fe a ni. Mipui hmaah minute tam fe zai hma hauhin kan ding tlawn zuar ringawt a nih chu! A zahthlak takzet! "A tha e" an rawn tih takah chuan chuan kan inring ta a: mahse, kan han tan dawn chiaha, a chhe leh tlat mai! Chutiang chuan a awm a awm ta a, men ngaihna pawh a awm tawh lo! A tawpa tawpah a rawn tha leh hlawl a, kan tan thei ta hlauh mai. Mahse, kan vanduaina a kaltluang kher em a, ka guitar line kha kan zai laklawh laiin a chiang lo leh ta tlat mai a, a ri ka hre thei reng reng lo a ni. Mahse, han a inthlahrunawm tawh em avangin kan tawp duh bik lo va, phuailuai takin kan tlingtla thei hram a ni. Kan zai lai hian kan Drummer lahin a symbol a lo khawng tla ve bawk a, kan zai zo chu kan zak tlang hle. Kan thian pakhatin a mobile-in lo cover a, kan en leh mai chu tah a chhuak hial.
No comments