School naupang hruai haw

Dt. 7th, Sept. 2017, (Nilaithawhtan) kan class bang kan haw kawngah mipa naupang pakhat kan tawng a, kan hahpui hle a, a lehlamah kan hlim hle tho thungm

Kan college hi college venga awm a ni a, kan veng awmna bulthut leh chuanhnuai a ni ber ang chu. A kar kawng hi thui tham fe a ni a, motor kawngpui dunga tlanin Vengpui luh a ngai a, hei hi motor pawhin a reilo berah miniute 3 emaw 4 vel tal tlan a ni hrim hrim ang. Chuta tanga chhoh tlan ngai leh chu a ni a, mah se a chho thui em em tawh hran lova, a karah veng khat chauh a tla tawh thung. Chutiang vel chu a ni kan veng leh college veng inkar dinhmun chu. Tin, Vengpui luh kher ngai lo pawha motor kawngpui zawha kan veng luhna hi a tam thova, kawng zawh ber erawh Vengpui kawng hi a ni.

Motor chuan man neih loh tum chuan college veng atangin ke a kalna kawng hnai tak a awm a, chutah chuan kan kal mai thin a, mahse, step chho em em hi a tam em em. A thui tham hlawm bawk nen chauhna tham fe hi a ni. Chutiang chuan hman ni ah sum kan nei lo leh pek a, kea kalin kan haw a, khua a lum em em a, thlantuiin min bual huh zul a, ni chu sa vawl vawl tak a ni. A lum huam huam a, kan chau hle a, kan thaw hlawi hlawi a. Kawnglakah kan chawl zur zut a, chho chhuah hlan mawlh kan nghakhlel a ni.

Chutiang chuan hah thi kul in kan chuang chhuak thei hram a, kan chauh em vangin kan chawl khawmuang a. Govt. High School thlangah a ni a kan chawlhna hmun hi. School naupang hmeichhia thenkhat chu school thlanglam, thing thelh sungna hmunah an lo thu a, chumi te pawh chu zah zo lo chuan kawr hlim meuhin kan awm a.

Chutia inphelh thawl huau chunga thuthmun kan han rem lai chuan naupang pakhat hi lungchhe vankaiin a lo kal hnak hnak a, a mittui chuan a biang tai tek chu a luan huh niaih a, a inhnit hlap hlap a, a lo kal zel a; ka lo en reng a. Ka lainat hle a, ka va pan hnai a, a bul ka thlen chuan ka kai a, ka chhawn thuai a. Chutia kan ngaihsak takah chuan a lungchhe zual a, ka kawngah a rawn kuah hial a, a tap hlep hlep a. Mipa naupang a ni a, KG 1 zirlai niin Adventist English Academy School, Siaha zirlai a ni.

Ka thiam dan ang angin a tah chhan chu ka zawt ngial a, a biak tlak loh hle a, “A nu a awm lo” tih hi a sawi zing hle ringawt a. Zingah i nu chu inah a awm em, ka ti a, “Um” tiin min chhang a, School-ah a hruai che em, tiin ka zawt leh a, “Um” a ti leh a. Inah i haw a, a lo awm tawh lo em ni, ka ti a, “Um” tih bawkin min chhang leh a. Ina I haw in tunge lo awm, ka ti a, “A pa” a ti a, a pa chuan a lo hau che em ni, ka ti leh a, “Aih” a ti lawi a. A nu leh a pa chu zingah an inhau em, ka ti a, an inhauh loh thuin min chhang a. Tichuan bang bo takin kan awm a, zawhna han zawh zui chiam chuan a buai ang tih ka hlau si a, ka rilruah chuan a school kal hlanin a nu hi a tlan ta em maw ni chu aw, ka ti a. A nih leh ni dangah I nu’n I school banin a lo hmuak thin che em, ka ti a, “Um” tiin min chhang a, a lo hruai ziah thin che em, kan tih chuan, “Um” a ti leh a, vawiinah a lo hmuak lo che em ni, ka ti leh a, “Um” a ti leh zel a. Ka rilruah chuan thildang a lo lut ta a, a nu leh pa te chu an inhauh ka ring ta lova, school bana a nun a lo hmuak ta lo chu bangbovin a hrilhhai a, haw kawngtluanin a inngaihtuah lungpuam a, in a thlenin a nu lo awm lo kher nen, a lungchhe zual a, a pa’n a lo ngaihsak tawk lo leh zel si a, inthlaka ina awm ta mai lo chuan a bag pawh dah hman lovin a lo chhuak leh a nih ka ring ta a.

An veng hming a sawi thei lo nen, hruai haw leh mai chu thain kan hria a. An in awmna lam kawk tura kan han tih chuan, hah em em a kan lo chhuah chhoh tawhna lam chu a kawk ta vu mai a. A kawk tawi viau erawhin kan hria a, a thlang lawk a nih kan ring a, kan hruai let ta a. A thlang lawk chu a nih beiseiin hei hi a ni em, kan ti thuai thuai a, a lu a thing zel a. Kan zui zel a, min hruai a ni ta ber a. Kan lo chhuah chhoh tawhna zawng zawng chu kan leh chhuk leh vek a, college veng-ah kan kir leh a, chumi piah lamah kawngpui atanga kan penna tak hmun atanga hla fe ah an lo awm leh ta nghal a. An in zawn kan thlenin amaha a kal theih tawh thu min hrilh a, kan vai liam ta a. Han chhoh that leh chu huphurhawm tak tawh a nih avangin motor kawngpui zawhin kan kal ta zawk a. Rei lo te kan kal ang tihah Motor pakhat hi kan phar ding chawt mai a, a hnunglamah kan chuang a, Tlangkawn veng thlengin min phur a, Auto in Tlangkawn atangin kan chho leh ta a ni. Thlantuiin min bual hneh khawp a, kawr hi a sawr theih hial ang tih tur khawp a ni. He ni hian khua a tang tha at mai a ni. Kawng lehlamah chuan a hlimawm thung a, khatiang em ema naupang lungchhia leh rilru na, ngawi renga han thlir liam ngawt mai chu nunkhua ti nuam lo tu a tling ve thei hialin ka ring a ni.

Ka ngaihtuahna vak velah chuan panlai nun a lo lang iarh iarh a, school kai tirha kan han khawhar thin zia leh in kan thlakhlelh a, chhungte kan ngaihzia te ka han hre thar a. Kan nu te’n school-ah min han hruai a, school kawta min han vailiam mai thin kha chu tawrhhar leh hreawm tak a ni a. Duhthala mahni in leh lova, thiante leh naupang dangte nena han nilen zak zak thin kha khawmawm loh tak zawng a ni. Nimahse, kan han thang chho deuh deuhva school-ah kan han tlangnel chhova, tuk tina kan lawiluhna thin zirna in chu kan ngaina chho ve tial tial thin. School kai tirh lam hian kan rilru a nova, ina kan tah lohna tur tam takah kan tap fova, lunglenin a fawm nen kan tlei har phian thin a. Hmel thar kan hmu tam a, zirtirtute hlauhna lo piang nen kan kimki tlangpui thin bawk. Tin, inhruai chungchang thuah ngat phei chuan nu leh pa emaw, u leh nau te leh chhung hnai ten an nau te school-ah an hruai thin a, ban hunah hmuakin an lo lam leh thin. Chhungkaw dinhmun inchen loh vangin nu leh pa ten an fa te an lo hmuak vek thei thin lova, tam tak an awm thin hmuaktu nei ve lo naupang. Dan naranin chhungte hmuah ngai loh naupang tan chuan a hlimchhawnah harsa deuh mahse chuti em emin an ngaihtuahawm zui lova. Nitin, chhungtena an hmuah ziah thin naupangte tan chuan nikhat lek school bana an chhungte hmel han hmuh loh thut mai pawh chu hrilhhaina tham a ni ang a, lungno mi tanah ngat phei chuan lungchhiatna tham a tling hial ang.