RISE UP

American zaithiam leh hlasiamtu ni bawk, Andra Day ina khawvel a nghinna hla, lungkuai leh mi cho chhuak thei, lai fana hnuk khawiha lungtichhiaa phurna min pe thei si hla, "Rise Up" tih hi kan ngaithla hlawm thin em. A Original hi a mawi khawp a, thinlung chhung tak a zen thei. Andra Day hi a aw a chak a, a pui a, a mawi a, a dangdai hle. Hetih laiin "America's Got Talent Show" kan en thin chuan, "Angelica Hale" kha kan hria ang. Naupang khawngaihthlak tak a ni. A naupan zual lai khan damdawiinah a tap chawt a nih kha. Kha nau khan "America's Got Talent Show" ah khan Audition a neih tumin he hla "Rise Up" hi a rawn sa a nih kha. Ka en apiang mai hian ka lai a fan a, a mi den a na thin khawp. Tuk tin hian ka en ziah a ni. La en lo kan awm chuan lo en ve ngei ru.

Hringnun sual leh natna khirh suala nun chhiara beidawnna-ina a bawh leh fo thin, manganga rum mek te kan awm ang, damchhung khawsak harsat vanga nun beidawng leh chau te pawh kan awm thei a ni. "I kut lo chu Lalpan kut dang a nei lo" an tih angin kan theihna zawn atang theuhva midangte tana malsawmna thlentu nih hi a Kristian em em. A hnung kan zui Isua khan thinhrik a nei hauh lo a ni. Heti a nih avangin bengngawngte hriat tham khawpa thahnem ngai thei tur in he hla hian kan nunah thu sawi thei se, hringnun hi a mawi lehzual tur.

THO VANG LE!

Chau takin i bawksawp a,
Hringnunah hmasawn thei lovin,
Tanpuitu reng i tawng si lo!
Mah se hei hi ka chah duh che,
Nangmahah khan huaisenna ka hmu a ni;
I ban lo vai la, ka lo vuan ang,
A ruala penin kal chhuak ila;
Tlang hial pawh kan sawn thei ang chu.

I tan ka awm a, ka ding reng fo bawk ang,
Kawla ni lo chhuak thin angin;
I tan ka ding nitin fo ang,
Hlau lovin ka ding ang a;
Vawi sang tam pawh nise ka vui lovang.
Tuipui fawn sang tak angin,
Hreawm leh harsa karah pawh;
I tan ka ding ang a,
Vawi sang tam pawh ngai se;
Vui lovin ka ding zel ang.

Reh ri bengchheng a chan hunin leh,
Ipik karah thawk lak a har tikah,
Chauva beidawngin;
Hringnun khamin fam chan i nuam thin,
Chuti ang hunah mi han dawn la;
Ka tiam che,
Tlang hial sawn tur paw'n theihna kan nei a ni.

Kan mamawh awmchhun chu beiseina,
Chu chu kan pahniha kan neih phawt chuan;
Tho chhuakin kan ding ngei dawn a ni.

Khawvel hi a famkim lova, a chhunga chengte pawh hi kan famkim bik hek lo. Humsual dai palh hi hringnun zia pakhat a ni a, tlukna hmuna leh reng erawh kan tih loh tawp tur a ni. Tluk hi a pawi reng reng lova, kan tlukna hmun atang erawhin kan tho leh thin tur a ni. Mi ropui leh pa hlawhtling tak tak te sulhnu leh an kawng te hi a mam purhin a fel thlip thlep bik hran lova, harsatna, beidawnna leh manganna thlipui tena a nuai leh hrual ve fe tawh te an ni hlawm. Beidawnna chhumpui bawh karah pawha beiseina meichher chhi a, hmalam pana kal tauh tauhin hlawhtlinna an hlawhchhuak a ni. Tumna tak tak emaw chhelna leh tawrhna tel lovin hlawhtlinna hian par a chhuah thei lo a ni. Harsatna kan tawh te hi mihringah a thuhmun vek thin lova, kan lo dawnsawn dan zawk hian kawngro a sut dan a inchen thin lo zawk mai a ni. Mi tu te emaw harsatna tawh, lo khaikhin a, lo teh a, lo um ve chiam chiam te hi a dik lo thei a, a tuartu rilru hriat thiam hi a pawimawh em em a ni.

Mihring mihrinna a inchen loh thin avangin kan tana harsatna emaw buaina tling miah lo te hi midangte tana lungngaihna tham tling buaina a tling thei a ni. Chuvangin a pawnga taka midangte chunga ngaihdan lo siam thuai thuaite hi a tha lo hle a, kan tih loh tawp tur a ni. Ngaihsam taka midangte chunga ngaihdan kan lo sawi thuai thuai te pawh hi midangte tan phurrit a tling thei tho bawk. Chuvangin nun hi uluk ila, a tul bak hi chu sawi lem lo ila, an sawi thin angin, "Mi a pawh a tawng tlem chuan mifingah chhiar theih a ni" an tih kha.