HUGH HERR

Hugh Herr-a hi October 25, 1964 khan, Lancaster, Pennsylvania, U.S-ah a piang a. Amah hi American Rock Climber rothap leh Engineer ropui tak a ni a, Biophysicist a ni bawk. Kum 8 mi a nih laiin Canada rama tlang lian tak tak pharh duaina; Canadian Rockies an tiha tlang pakhat ding, Mount Temple, Ft. 11,627 (3,544 m) zeta sang chu a lawnchhuak daih tawh a, kum 17 a tlinin United States-a tlanglawn thin hmingthang ber berte zingah a lang daih tawh a ni.

Mount Temple 

                 

Kum 1982, January thla khan, Hungtinton Ravine: Tlangpanga vur tawlhina ruam/kawr a siam, Mount Washington tlanga awm; New Hampshire-ah a thianpa nen an vak dun a. He hmun hi a hlauhawm hle niin an sawi thin. Helai hmuna an kal tum pawh hian a thianpa, Jeff Batzer-a nen thilo aruangin vur thlipui na tak tleh karah kal ngaihna hrelo leh chau taka an awm laiin chhanchhuaktu pawl ten an va hmu a. Great Gulf ruam lam erawh an pan niin an hria a, zan thum zet helai hmunah hian hun an hmang a, a vawh lam chu, -29 C (-20 F) zet  a ni. Vur ei (Frostbite) vangin nasa takin an hliam a, Herr-a ke pahnih chu a khup hnuai chiah atanga tanchhum a ngai hial a. A thianpa pawhin a ke veilam leh ke zungtang dinglam a chan bawk a. Tin, a kut zungtang ban dinglam ami chu a chan bawk a ni. Hemi tuma chhanchhuaktu pawl zinga pakhat, Albert Dow pawhin vur min/vur tawlh (Avalanche) vangin a nun a chan ve hial nghe nghe.

Huntington Ravine 

             

Thla tam tak chhung chu zaipui a tawh vangin khumbetin a awm a, a inenkawl dam hunchhung pawh a awh rei hle a. Mahse, mak tak maiin a inenkawl dam hnuin tlanglawn bawk chu buaipuiin a chhuak leh a, tlang tam tak a lawnchhuak leh ta tlat mai a ni. He thil hi Doctor te tan pawha thilmak leh danglam, ropui bawk si la thleng zen zen lo a ni hial reng. Herr-a hian a chetsualna avanga beidawng taka natna khuma mut mai mai chu a tum lo bur a, a thiamna leh finna hmangin khawl ke (Prosthetic Feet) chu siamin a hmang a; a hlawhtlinpui chiang khawp bawk a ni. He khawl ke (Prosthetic Feet) ama tana a duan hi lung te tak te, pawisa thir hmai tiat leka hlai chungah pawh ding ngil at thei tur khawpa tha leh khawngin a hmawr (Ke zungtang) a tikhawng a, Metal chi khat, ‘Titanium’ chu vur panga awih leh bir tak pawha tha taka lawn theih nan a ngal atan hmangin a vuah a. Ke lem/Khawl ke a hman hnu hian vanduaina a tawh hma aiin a nunah hmasawnna leh hlawhtlinna a chang nasa zawk daih tih theih a ni. Kut ke kim lo ni mahse, inelna hrang hrangah a chhuak nasa hle a, kut emaw ke nei tawh lo te zinga mipangngaite inelnaa tel thei hmasa ber a ni nghe nghe. A tha leh challang, thiam thlan bik (Elite-Level) ah te pawh intihsiakna beitu a ni ve hial thei a. Tin, pianphung dik lo leh kim tawh lo te inelnaah te pawh a chhuak ve fo tho a ni. Hugh Herr hian nupui fel leh duhawm tak Patricia Herr neiin fanau malsawmna dawngin fanu pahnih an nei a, Alexandra leh Sage te an ni.

Artificial Limbs (Prosthetic Feet)

Chetsualna (Accident) a tawh lai hian kum 18 mi chauh a ni a. A vanduaina chuan tumruhna a nunah a siam hlauh thung a, zirna lamah insawrbingin Millersville University atangin Physics-ah Under Graduate a zova. MIT atangin Mechanical Engineering lamah Master Degree a zo leh a, Harvard University atangin Biophysics-ah PhD a hmu leh a ni. Postdoctoral a nih laiin MIT-a Biomedical Devices-ah Researh beiin hna a thawk ngawrh hle a. Heta a zirbing leh buaipui ber chu; ‘Prostheses’ leh ‘Orthoses’ a ni. ‘Prostheses’ hi taksa bung hlauh tawhte tana khawl hmanga thlakna lam a ni a, ‘Orthoses’ hi pawn lam atanga ke charna lam, a ruangam leh thahrui lam emaw hriatna thazam lam siamthatna lam a ni awm e. 

Tunah hian MIT-a Program pakhat, Media Arts and Sciences, leh Havard-MIT Division  of Health Sciences and Technology-ah te hian Associate Professor in a awm a. Tin, MIT Media Lab-a Research Group, Biomechatronics an tiha a hotu ber (Head) a ni bawk. A buaipui lian ber chu, miring taksaa bel mai theih khawl, mihring puitu atana duan a ni ber a. Hei hi ama hmakhua leh a tan ngawr ngawra tulpui a nih loh thu a sawi a, mi tam tak kutke kim lo leh ramtui lei lo te tana hman tangkai theih tho tur pawh a ni, tiin a sawi.
Engineering Science hmasawnna lama thawhhlawktu berte zing ami a ni a. Science hmanga inenkawlna lamah hian lehkha tam tak a lo chhuah tawh bawk a ni. University hrang hrang paruk inzawmkhawm; ‘Biochemical’ lama thiam filawr mi pasarih leh ‘Physiology’ lama thiamna bik nei parukte zingah a tel a, an Research beih chu ‘Oscar Pistorius’ running blade, tiin an vuah a ni. He ‘Oscar Pistorius’ running blade hi ‘2011 World Championships in Athlete’ ah khan Oscar Pistorius an a lo Champion pui tawh a ni. Pistorius-a hi South African mi a ni a, kum pawh ala tlin hma thla 11 chauh a nihin a ke pahnih tan a lo ni tawh a ni.

Oscar Pistorius

               

Hugh Herr-a chawimawina dawn langsar zualte;

•Sports Hall of  Fame (1989)
•United States College Academic Team (1990)
•Young American Award (1990)
•Science Magazine Next Wave: Best of 2003
•TIME Magazine Top Ten Inventions 2004
•With the Providence VA Center for Restorative and Regenerative Medicine and Brown University, a $7.2 million grant from the US Department of Veterans Affairs to create “biohybrid” limbs to restore natural function to amputees. (2004)
•Popular Mechanicals Breakthrough Leadership Award (2005)
•13th Heinz Award in Technology, the Economy and Employment (2007)
•Action Marverick Award (2008)
•Spirit of Da Vinci Award (2008)
•R&D Magazine’s 2014 Innovator of the Year
•Smithsonian Magazine American Ingenuity Award (2014) in the Technology Category
•Princess of Asturias Award for Technical & Scientific Research (2016)

Tin, hmun hrang hrang; tlang leh lunghmun ko bir tak tak te a lawnchhuak hnem tawh em em a ni.

Hugh Herr-a lung-kham lawn lai