2016, Remna Ni puala Mara Students Organization (MSO), Saiha te buatsaih, Essay (Thusep) inziahsiaknaah lâwmman pathumna ka dawng ve hlauh mai a, ka lâwm tâwk a tling ve hle a ni.
He intihsiaknaah hian a thupui atân "Value of Peace" tih hman a ni a, words limit hi 1000-1300 a ni bawk. Tin, he intihsiakna hi HSSLC leh College zirlaite puala buatsaih a ni.
English hian thuziah ka thiam lo hle a, Mizo tawng pawhin ka thiam chuang hek lo. Amaherawchu thuziah hi nuam ka ti hrim a, Mizo tawng hi chuan ka ziak ve fo thin. He intihsiakna pawh hi ka huphurh khawp mai a, tunlaiah School tha tak tak atangin thiam tak tak an chhuak tawh a, English nâl tak tak te pawh an tam tawh mai a. Keini ang duang tân chuan han el phâk loh túr vek an ni tawh mai si! Mahse, tawnhriat atân leh chona atân tiin ka tel ve thâwr mai a ni. Mizo tawnga buatsaih ni zâwk se la chu zia tak tur zâwk hi a ni a, kan ziak ve duah thei maithei a ni.
He intihsiakna hi 27th, Jun, 2016 (Monday) a buatsaih a ni a, Result hi 30th, Jun, 2016 ah Remna Ni lawmna puala inkhawm buatsaihah puan a ni. Result puanna hmunah hian lâwmman sem nghal a ni bawk.
Beiseina ka neih sân loh êm avângin Result puan ni ah hian ka tel ve ngam lova, kan inhmun sâmfaiin hun ka hmang daih a. A zânah WhatsApp lamah he intihsiakna a tel ve tho, College lama ka hmelhriat hnên atangin Result hi ka hre ve chauh a ni. A tûkah ka thianpa nên MSO Office atangin lâwmman chu kan la a, ka mamawh lei nân ka hmang nual a, a bâng la awm chu ka nu ka pe bawk.
Ziaka intihsiaknaah hian ka vawikhat telna a ni a, ka thlen chinah hian ka lungâwi mai piah lamah ka lawm em em bawk a ni. Hmasâwnna túr tam tak ka nei tih ka hriatna ringawt pawh hi ka tân chuan, hlawkna tam tak a ni tawh hrim hrim. Higher kan zir lai ni ta in ka hria, tumkhat chu kan School-ah lemchan tâwi hmanga intihsiakna buatsaih a ni a. Kan School naupang zawng zawngte hi Group 4 a then kan ni a, kan Group pawh chu kan inbuatsaih nasa khawp mai. Kan Group lemchan tur; thawnthu riruang (Plot) leh lemchangte inbiakna (Dialogue) buatsaih chu ka kovah an nghat hmiah mai a. English veka ziah a ngâi bawk si a, ka huphurh em em a, mahse, ka pha ngam bawk si lo. Harsa tak chungin ka duang zo ve mai a, kan hlim tlâng ve khawp mai. Tin, kan vannei khawp a, pakhatna kan ni ve hlauh mai a, kan lawm tlang teh asin aw!
Ka thian, Valentin-a te in ah, ka lâwmman dawn; pawisa fai hi thla kan lâkpui ve a nih hi.
No comments