Hmeichhe finin tuikhur ràl a kâi lo tih hi hmeichhe ho hian an helh khawp a, an pawm thei hlawl lo a ni ber. Mahse, hei hi thudik a ni miau si! Tunlai khawvelah chuan hmeichhe dinhmun hi a țha tawh hle a, khawi hmunah pawh a lailum an chang thei zél tawh a, a sâng ber thleng pawhin hmun an luah thei tawh hial a ni.
Hetih lai hian, hmeichhe finin tuikhur rál a kâi lo tih hi hlamchhiah theih ngawt a ni lo. Mizo thufing pakhat a ni a, vawiin ni thlenga la danglam lo a ni. Hmeichhe tân pawh helh tur a ni lo. Hmeichhe dinhmun ngaihnêpna lam a ni lova, diriamna emaw chungtlâkna lam thil pawh a ni chuang hek lo. A thufùn leh awmze dik man tâwk loh avanga diriamna țawngkam ang maia ngaihna hi hmeichhia te hian an hnualsuat a pawimawhin a țúl takzet.
Hmânlai nunah chuan, kan pi leh pute kha lo neia eizawng leh ram lama hnathawk țhin an ni a. An damkhawchhuah theih nân kâwla ni chhuak chhiarin ram hna hah takin an thawh a țul si a ni. Lo neih leh ram lama hnathawh nitin mai chu hahthlâk tak a ni a. Hmeichhe âwmnêm tan chuan thil harsa tak a ni réng. Ram lamah chuan fehchhuak ve tho țhin mahse, mipa tluk ngaihna a awm lova. Tha leh zung an neih țhat tâwk loh rualin ram lamah chuan remhriatna pawh mipa ai chuan an tlachham zâwk réng a ni.
In lamah țuan an rel nasa zâwk thung a; eirawng báwl, tuichawi leh sekrek an khawih thung a ni. Tin, tuikhur hi lam hnaite-ah an nei țhin a, tuikhur chin piah lam chu ram a ni tawh mai țhin a ni. Chuvangin, hmeichhe finna chuan tuikhur rál —‘‘Ram’’ chu a thleng pha lo réng a ni. Vawiin ni thleng pawhin ram lamah chuan hmeichhe tân mipa te chu tluk ngaihna a la awm lo hrim hrim a, khawvel awm chhûng chuan a thlen a rinawm loh bawk. Pathian min siam dan kalphung pawh a ni hrim hrim. Thahrui leh chakna hi hmeichhiate aiin mipa te ah Siamtuin a dah tam bîk hrim hrim a, ram lama chéttlatna atân chuan thahrui hi a pawimawh hle a ni.
Ram lamah chuan hmeichhia te aiin mipa te chuan remhriatna an nei țha zâwk a, an chak zâwk bawk a. Hnathawh pawh an chak zâwk a ni. Hmeichhe remhriatna chu ram lam aiin in lamah a chhenfakawm zâwk daih. Tuikhur awmna hi ram ti’a chhál a ni ngai lova, tuichawi pawh ram lam hna ni lovin, in lam hnaah ruat a ni bawk. Chuvangin tuikhur piah lam — ram lam hna-ah chuan hmeichhe finna chu mipa te remhriatna aiin a chhawrhnaawm loh zâwk a ni, tihna mai a ni.
Chuvangin, he thu hi hmeichhe tan huatah lâk theih a ni lovang.
Hmeichhe dinhmun hi abîkin India ramah a chhe zual hle a. Education field-ah pawh harasatna tâwk nasa tak an ni. He thil hi dánin a ngâi pawimawh hle a, hmeichhe hamțhatna tûr atân nasa takin hma a la réng a ni. Tunah chuan hmeichhia te dinhmun chu nasa takin a inthlâk danglam tawh a, kawng tam takah chanvo hauh sak an ni tawh a. An kalkawngte chu țha taka sial sak an ni tawh a ni. Hmun zau zâwk han thlîr ila, sorkarah hna lian tak tak chelh tute chu hmeichhia an ni tawh a. Ram hruaina kawngah a fawng vuantu ber te pawh an awm fur tawh a ni. Mizo hmeichhiate pawh tunhma lam ngaihtuahin tunlai khawvelah chuan an dinhmun chu ziaawm tawh tak a ni. Tapchhak zâwl ațangin pisa lian pui puiah an insuan tawh a, ram leh hnam tâna mi țangkai leh pawimawh tak tak an ni fur tawh a ni. MLA hmeichhia te hial kan nei tawh a ni. Chuvangin hmeichhe ngaihnêpna hrim hrim rilru hi mipa te pawhin kan paihbo a țúl takzet tawh a ni.
Kan topic bîkah hi chuan tûnhma mizo nun ațang leh tún dinhmun thleng pawhin hmeichhia te hian mipa te hi ram lamah an tluk thei lo a ni tih a ni a. Hmânlai nunah chuan ram hna kha an innghahna a ni mai a, hmeichhia te chuan ram lamah chuan mipa te kha el tumna pawh an neih a rinawm loh a ni. Khawvel a changkang chho zel a, kan khawsak phung, eizawnna leh hnathawh dán a danglam zo tawh a. Ram hna kan thawk tawh meuh lo a ni. Kan eizawnna hmanrua chu thiamna a ni ber tawh a. Mipa thluak leh hmeichhe thluak hi a danglam tehchiamin a rinawm lova, chuvangin a hmang rim apiang an thluak a chak a, remhriatna leh finna an nei tawh mai țhin.
Eizawnna kawngah thiamna, finna leh remhriatna te kan hmachhuan tawh si avangin hmeichhe tân pawh mipa han el chu thil harsa a ni ta lova. Túnlaiah thahrui ai chuan thluak țhain kawngro a su tawh zâwk miau si! Hetah hian, mipa ai chuan hmeichhia te hi a tlângpuiin an taima zawk si a, chuvangin thiamna kawngah mipa te an tlanpêl zung zung tawh mai a ni.
Hmeichhe tam zawk chuan, kan topic khi a ni lo zâwnga kuaiherin, ‘‘Hmeichhe finin tuikhur ràl a kâi lo, tih te chu tih mai mai! Tupui ràl a pêl zâwk,’’ tiin mipate chu hmai zangthal árh-in an tih-el tawh mai țhin a ni. A nihna takah chuan, tun thleng pawhin mipate chu tuikhur ràlah min la tluk chuang lo a ni. ‘‘Tuikhur ràl,’’ tak hi mizo context-ah chuan ‘‘Ram’’ a nih miau avangin.
No comments