Niminah Km-4 vel zet tura thui khawlaiah Vawk kaiin hun ka hmang a, kan Vawk kaih hi inchi 47 zeta lian ni in; a thau mang mai a, a mawng erawh duhthusam a ni lova, a zuih angreng hle! Veng mawng tak atanga kai kan nih avangin, kawng a chho ulh khawp a, 3/2 zet chu kawng chho a ni. Tin, lamlianah kan kal ngam mai lova, motor luh vak lohna hlir kan zawh daih thung a; hei hian kawng a tithui zual hle. Kan Vawk kaih kha a kal chak thei lo hrim hrim nge? A tum lo ve hrim hrim tih pawh hriatthiam a har takzet a, a hmanhmawh lo lutuk kha a manganthlak takzet a ni. Ka thianpa chuan a tihthan tawh avangin a dim lo khawp a, a ke hnunglamah a hlap awl lova, ka lainat ru khawp. Tin, ka hlau hrim hrim bawk a, a hmingin hmawlh chu ka lek na a, ka hmang mang lo thung. Tlai dar 4 vela thawkchhuak kan ni a, in kan thlen chuan dar 8 a ri thuak. Kan thlung fel a, kan tin san zui nghal a.
Tukin dar 2 velah kan thawkchhuak lehnghal a, bazarah zawrh tura kan peihfel hun chu 6:30 vel a ni. A tul ang kan tihfel hnuin a zawrhna dawhkanah kan inhung ve ta nghal a, heti thleng hi chu hna panngaiah ka ruat. Mi ruaitu hi kan lam hnai tak a ni nghe nghe. Mi ruai a, a chhawr ka ni. A thu hnial tur ka ni lova, a sawi chu zawm mai tur ka ni. Chuti ang zel chuan, a sah laiin a bula ding turin mi ruat a, min dawr tute sa, rang taka polythene-a a sattu-in a rawn khung zung zung theih nana lo keu kau sak thuai thuai zel chu ka hna a ni. Hetah tak hian a ni ka duh loh tawp ka tih tak ni, ka la thawh ngai loh thil a nih avangin ka hrethiam mai lova, a dan ve tur rengah ka ruat a! Ka ti ve mai a ni. Kan sa buknaah chuan sa them, gram 200 vela rit, polythene langtlanga tuam hi KG khat bukah min vawm tir zel a, polythene ka keu kau va, a sattu chuan sa buk tawhsa chu a rawn khung zel a. Mahse, a thun pahin chu sa-them, gram 200 vela rit chu a la let leh zel thung a. Tichuan, dawhkanah puanchhe takin kan khuh tlat a, rang taka vawmluh thuai thuai tur a ni.
Reiloteah he thil hian ka awm a tinuam lo takzet a, chu a chhapah, "A check tute hi mitmei kar rawh, an lo round thin a nia," ti'a fimkhur tura min hrilh hnu phei chuan ka tih tura tuk mahnise, thil dik lo ngei a ni tih chiang takin ka hria. Chumi avang chuan ka che khawr khawp mai a, haw leh mai ka duh rum rum a, mahse, mi ruaitu chu ka hmaizah em avangin lungthlu lo zetin ka tluan tho thung.
Vawikhat chu nu pakhat, fing tur tak hmelpu hian, a sa kan buk laia ka thil vawm luh chu a rawn hmu chiang khawp a, a zungchal meuha kawkin, "Kha thil kha eng nge?" tiin min melh thîp khawp a, chhanna ka pe thei lo. Ka chhang ngam lo zawk pawh a ni mai thei, ka hre lo. Min zawt nawn lui char char ta deuh deuh va, hnuailam bihin ngawih ka chuh lui tlat a; ka zak a, ka zam hle bawk. Rang takin a sattu chuan, uai nawlh khawpa rit a pe thuai a, a kal ta hlauh zawk a ni.
Hetih lai hian fello tak ka ni tih hi ka pawm thlap, ka fellohna hi tam tak sawi tur a awm ang. Chutihlai erawh chuan, heti ang thil kherah hi chuan, tam tak hlawh tur pawhin min ruai leh dawn ta sela, ka pawm ngam tawh lovin ka ring.
Ka ngaihtuah zui mai mai a, Kg khatah gram 200 zel trik a ni a, Kg khat cheng 250-a hralh a ni bawk a. Gram 200 trik a nih chuan, cheng 50 manin a tling ta thin lo a ni. Gram 800 chu Kg khata chhiar a ni tihna a ni a, gram 200 chu cheng 50 man hu zel a ni bawk a. Kg khata khai sá chu, gram 800 chauh a nih si avangin, cheng 50 chu a sattu ten an hlêp ta thin a ni.
Bukna tling lo hi Lalpa mithmuhah thil tenawm tak a ni a, ringtu inti te chuan kan hnualsuat tur a ni. Mizoram hmun hrang hrangah bukna tlinglo hmang thin tute hi an awm a, sawrkar pawhin theih tawpin a buaipui tak na in, kan la khap hneh lo niin a lang. A mipui lam hian kan zir lo ve tho bawk a, a chhan chu, buk tlinglo tih hre reng chung pawhin a bikin sá hi kan lei tho zel mai si a, hei hian sawrkar hmalakna kawngah pawh kawngro a sut tîr thei tlat thin lo.
Tin, Bawng leh Vawk hi khawi hmunah pawh a man sang chak hle mai a. Sá sattute pawhin buk tling taka zuar tur chuan hlep an nei thei mang lo niin an sawi ve lawi si a, a khawilai atang berin nge hmalakna hi tan tur ni ang tih pawh hriatthiam harsa tak a ni.
No comments