Kungpui a tliak ta!

Ka pi, F.Zakungi, kum 84 (1933-2016) hian he khawvela a nunkawng bumboh, harsa leh țițoh tak chu January, 09, 2016, tlâi lam 3:50 PM khân, hnutiang chhawnin a chhandamtu hnênah min chawlhsan ta a. Amah hi mi nun-tlang (straightforward) tak mai a ni a, lem chan hi a thiâm hlawl lo a ni ber. Chhûngkua khâikhawma khâiding bertu a ni a, chhungkaw innghahna ban pui tak meuh a ni. A bulah chuan kan him a, kan hlim thin.

A fa la dam te

Ani hi ka tan a tha em em a, amah avang hian tun dinhmun te pawh hi thleng ve thei niin ka inhria a. Pawl 6 - 12 ka zir chhung zawngin a kiangah ka khawsa a, min enkawl seilian a ni. Heti chhung hian min en hrang ngai pawhin ka hre lo. A fapa, Hmingthanzuala hi ka sikul kalnaah chuan zirtirtu hna thawkin a awm ve thin. 

Middle School ka rah lai vel hian ka a em em thin mai a, kawng lehlamah chuan min hlimpui letling a. Chuti reng reng chuan kan khawsa chho a ni. Hostel-a awm thin ka nih avangin chawlh hun chhung hian a kiangah ka khawsa thin a. Amaherawhchu, kan sikul hian chawlh kan nei tam lo ang reng a, kum khatah thla thum tha chauh hi chawlh kan nei thin. Chuti ang hunah chuan a hnenah phur takin ka haw ve thin a ni. 

Ka pi hi a mizia a dangdai ang reng a, ri thuai thuai thin mi a ni a. A huat zawng emaw, a lawm zawng thilah pawh ri phawng phawng chi a ni. A tawngkam te hi a hraw thei em em a, lawmna tur chi-ah chuan a lawmawm ngang a, zahna tur lam thilah chuan zahthlak duh tak a ni. Mi a han fiam te hian a dim lo thiam thei em em a, a chutih vang erawh chuan tupawhin an nel thung. Thup tit tet hi a neih loh avangin a rilru hi kan hre tlang thei mai thin a. Tumah a huphurh ngai lova, inleng te biak chhiat a nei ngai lo. Pasal sun tawh a ni a, a sun kum chiah erawh ka hre ta lova, hman thil a ni tawh a. A fapa leh a tu leh fa te ho chu a hmeithaipui a, a thih ni thlengin a tulpui ta a ni.  

A chenpui a tu leh fa te

A fapa Hmingthanzuala leh a tunu (Hmingthanzuala fanu) Tetei

A fanu Helen Lalsangliani te chhungkua

A fanu Lalromawii te chhungkua

Midang lakah chuan kan thlavang a hauh na em em a, a lung kan tihawi loh palh erawhin min dim hauh lo thung. Thian kawmngeih em em a nei a, engtik lai pawhin an inzui chawt thin. Chu a thian kawmngeih em em leh a thiantha ber ni bawk chu pi Hmuaki a ni a. Ani chu ram hna thawk thin a nih avangin kar tluana leilet lama riah te a lo tul thin a. An hna tul zual chang chuan an inkawm hlei thei meuh thin lo. Chumi karah chuan ka pi hi a khawhar a zual em em thin a, chuti ang hunah chuan lehkhaden a sawi thin a, a nih loh leh checker te kan khelh pui thin.

A thiannu pi Hmuaki

Pathian malsawmna dawngin tu leh fa duhawm tak tak a nei thluah a; tin, mitin ngainat a nih avangin hmangaiha duhsaktu pawh hmun tinah a nei a. A tulpui a tu te chu nula tih takah inleng an ngah ve thin lah tak a, chuti ang inleng tlangval te chu tumah huphurhna mitin a melh ngai lo. A tu-a te mai pawh chuan an nel em em vek zel zawk thin a. Tin, a chapo lo em em a, mi tupawhin atana thil an han tihsak ve chang te hian a lawm thiam em em a,  chu chuan mi a tiphur a thil tihsak a chakawm hliah hliah thin. Hei vang hian tun thlengin hrehawmin ka awm phah a, a chhan chu thil tha tak han tihsak ka la nei ve tlat lo a ni.

A nau Lianhrima te chhungkua

A tu leh fa te

Amah kha chhungkaw innghahna ban pui tak meuh a ni a, chhungkaw khai dingtu ber a ni. A tel lo chuan chhungkaw khawsak a buai zova, a tu leh fa - mual hran hrana awm te kan inpawhna leh inzawmna te hi amah hian thui tak a hril a. Khua a lo rei ang a, ani tel lo hian engtin tak inpawh thei zel ang i maw! A la sarhu em a, engtiang takin nge a hmun ruak hian nghawng a neih dawn tih pawh hriatthiam a har a, khuareiah kan la hre chhawm zel ang chu!

Pu Manga te chhungkua leh nu Thangpui te nu fa

Lalhrilliana

Vengchhungah te pawh mi hlun leh mi hmasa te an lo nihna-ah a lar phian a; tin, amah hretu hi veng tinah an awm thluah tih theih a ni bawk ang. A vui ni-ah pawh mi an lo kal tha em em a, rin phak bakin min tawrhpui ve a ni tih a hriat.

A han that loh chhoh tak viau hnu leh, beiseina a charau viau tawh hnuin keipawh min han hrilh a. A dam loh thu hi chu ka lo hre sa tho na a, chuti vut vuta thalo chho turah ka ngai lem lova. Phone atangin ka be thin a, ka ngaihven reng thova. Tichuan, a zual thu min han hrilh tak thutah chuan mangang takin Serchhip chu ka pan ta rawih a, ka thlen tlaiah ka va hmu nghal a. Mahse, min hre thei tawh tlat lo! A tawng thei tawh lova, a lo cher em em a, khumah a chahthlak hun nghakin an lo  mut hi a ni ber tawh a. Chuti a nih avang chuan tih theih a tlem em em tawh a. Ka thlen thu an han hrilh a, ka hming lama an han hrilh te chuan a buai em em a, thei leh thei lovin a rilru a seng ve a, a hah em em a. A tana a harsat ka rin avang leh a chauh phah ka hlauh avangin, tikhan awm tir mai rawh u, a pawi lo; a zual phah palh ang tiin ka hrilh hlawm ta ringawt a. A en pawh ka en hlei thei lo, ka lainat a ni.

A natna hi cancer a ni a, chhel takin tuar tang tang mah se upa lam an ni tawh avangin a taksa chuan a hneh ta ngang lova. January, 09, 2016, tlâi lam 3:50 ah min kalsan ta a ni.

A nau Lianhrima

Ka hringnunah hian ka tana mi pawimawh zual bik te hming han sawi dawn ta ila, ani hi a hmasa berte zing ami a ni ve ngei ang. Chuvangin ka tan hian a pawimawh em em a, a hunlai khan ka lo hrethiam thin lova. Min enkawl lai pawh khan lungawi lo leh rilru na pawhin ka lo siam fo thin mai thei a, a tana harsatna thlentu te pawh ka lo ni fo thin mai thei. Chutianga ka lo awm ve thin a nih phei chuan pawi ka ti tak zet a. Hring chan chhunga a hnena ngaihdam ka dil hman ta lo tur hi a pamhmai ka ti a, ka inchhir hle a ni.

Mitena an duh loh leh an hnawl hnu kei ve mai hi a ang-chhungah min pawm a, min enkawl seilian hi ka tan chuan ka dam chhunga ka rulh sen loh tur hmangaihna leh duhsakna a ni a. He leiah intawng tawh dawn lo mah ila; nakinah vanah kan intawn leh hunah lawmthu ka la hrilh ang a, ngaihdam ka tulnaah thupha ka chawi ngei ang.

Heti maia a liam hi kan la tiam lova, a na kan ti. "Lo kir leh rawh," tiin ko lawm lawm mah ila, Zion khawpui mawiah a chhandamtu fakin lei hrehawm ngai lovin a leng tawh thung a, hei chauh hian min thlamuan thei a ni. Muang takin chawl ang che aw, ka pi.