Țhianțha

Țhiante hi an hlû a, kan lungngaih ni a kan inhnemna leh kan hlim ni a min lâwmpui tu te an ni țhin. Induhsak thu-hlaah pawh kan rilrua lo lang hmasa ber țhinte zinga ami an ni awm e. Puih ngâia kan awmin kan țhiante kan pûr hmasa ber fova. Hun harsa kan tawhin kan bulah an ding ve țhin a. Țhian tel lo nun chu a rûak em em a ni.

Amaherawhchu, țhian thlan thiam hi a pawimawh khawp mai. An ti țhin a, "Țhian sual kâwm suh, i hruai țhat hma hauhin a hruai sual ang che," tiin. A dik khawp mai. Mitinin duhthlanna kan nei țheuh a, mimal ngaihdân te nen lam. Keimahni zir leh zir loh chu thuhran nise, țhiante nena awm ho nikhuaa an tih ang tih ve loh te, an bula awm reng chunga thurualpui si loh te leh thil dang pawh a tam thei khawp ang. Hêng hi thil harsa tak mai a ni. Duh inang lo na na na chu a inkawp rei theih tak tak loh an ti a. Chuvangin kan țhiante chu mite'n mițha a ni lo an tih tawh chuan, keimahni lam pawh hi in enfiah ve fê kan ngâi tawh tihna a ni ang.

Chutihrual erawh chuan, țhiante thil tih ang tihpui ve miah si lova, zui ve chawt hi an awm ve teh tlat țhin. Kan țhian pakhat pawh zû chu sawi loh, meizial pawh zu ngai eih lo a ni a; kuhva hi chu a châng chângin a ei ve țhin a. Ti ve khanglâng ila; kan in ve țhin lai tak tak khân, kan bulah a tâp ve chawt a. Kan in lai te hian kan bulah țhu ve in, a țawng duh ber berah a țang fo țhin.

Mizo khawtlâng nunah chuan kan inkâwm khâwm dial dial a. Kan pi leh pu te hunlai ațang tawhin an inlâwm tawn a. Hlim tlâng takin an inkâwm khâwm dial dial țhin.

Țhian han tih mai hian a huam zâu viau thei a. Kan hmelhriat hnaivai leh kan bula khawsa tam deuhte hi kan pawh zual a. Hmelhriat satliah an awm a, kan be chhe chuang lem hlei lova. Kawm zeuh zeuh kan nei a, kawm bik kan nei bawk țhin. Hnathawhna, sikul, college leh kohhranah țhian kan nei hrang leh fir fer a. Vengchhûng leh khual khuaah te pawh țhian tih ngam kan nei leh zel a. A hun leh hmun azirin kan țhian kawm dan erawh kan siam rem ve zel țhin. Heng ho zawng zawngte bulah hian kan inbun ruakin, kan bawh buai ngam vek kher lo țhin tlângpui a. An mizia a zirin kan kâwm a, tih lâwm hrâm hrâm kan tum țhin. Mahse, inthup țiț țeț awm lo, nihna ang anga kan lanchhhuahna, sûmkâr îhe awm lova duh duh kan sawi ngamna țhian kan nei leh ta cheuva. Kan thuruk nen lam kan hrilh fai leng thung țhin. Chungte chu kan inbunruahna leh inthlahrung lêk lova kan pawh phar a, kan bawhbuai țhinte an ni a, hei ve thung erawh hi chu țhianțha kan tih hi an ni mai lawm ni? Kei chuan thiantha tih lai tak hi ka man thiam chiah lo a ni. 

Dan naranin ka hmuh ve danah chuan, thianțha han tih bîkah pawh hian kawng hnihin a thliar theih awm e. Pakhatna-ah chuan mi fel tak, ruihtheihthila fihlim leh mi pangngai tak, khawtlângah pawh zahpui awm loh țhiante hi țhianțha an tih theih ang a. A dik dik chuan nunkawng ngil taka min khalh theitu te tihna a ni ang. Chungte chu kan chhungte pawhin min zah sak a, an lawm thin.

A pahnihna-ah chuan, thatna lai han sawi tur pawh nei hran lo, chhawrnaawm lo leh an tangkaina awm reng reng hriat tur awm lo te an ni. Mahse, kan kawm bulfûk te an ni ve leh thei tho bawk. Chungte chu a then chuan min kawm fo lo tur te in min duh thin.

Kan rilru milpui thiante hi kawm an nuam bik a, thurual a sam a, tui zawng a inang leh lek te phei chuan a nuam em em a ni. Mahse, khawsak leh nunphung emaw eibar zawn leh hmalam ngaihtuah vanga awm hmun sawn thin kan ni a. A then chuan an kalna apiangah thian thar an siam zung zung thei a, a then te erawhin thian siam an harsat hle thung. Tichuan, kan awmna apiangah mi pangngai chuan thian an siam zung zung a, tui zawng a lo inang phei chuan an kawmngeih thuai thuai zel thin. Tichuan thian kan nei zur zut a, a tua te ber chu nge kan thian tak tak chu ni ta ang. Kan tana tha tur min duhpui a, mi fuih thintu te hi an ni mai a ngem? Nge ni a, kan mamawh apianga min tihsak theitu ni zawk ang? Tin, kan rilru zawng zawng kan bunruahna theihna te chu em ni dawn? A buai ta nuaih mai a ni.

A chhe ber thlenga min kalsan ngai hauh lo tu te hi thiantha tiin keichuan ka chhal a, chungte chu hausakna leh khawsak theihna avang chauh pawhin an theih chinah min tlansan lo thei a ni thei. Mahse, tih a la ngai tlat a ni. Tih theih tak tak pawh a awm tawh loh hnu leh tuar hial a tul hunah pawh kan tana tuar ngam, min phatsan ngai hauh lo tur te hi thiantha tak chu an ni. Tin, thian inkâwm țhinte inkâra inpawhna thûk tak a awm hian an mizia leh nunchangah țhatna îk nei lo mahse; an tân chuan țhianțha an ni tawn ve ve a. A mihring lam ni lovin an in thlunzawmna kha an tân chuan ințhianțhatna chu a ni mai.

Ințhianțhatna chu rilrua inzawmna lam hian a kâwk ber a. Hmêl, hausakna leh dinhmun lamin awmzia a nei lova. Induhsak tawnna leh inrel phârna tel lo, tlinlohna inhaider sak leh hmâkhua inngaihsak tawnin; ui leh î a awm lova. Inpêkna thûk tak awmin, inhriatthiam tawnna in a khat a, ngaihdamna thinlung a nei bawk țhin.

Heng zawng zawng hi țhianțhate chuan an nunpui țhin. Chuvangin țhian te hi an hlu em em a, țhianțha te hi an hlu lehzual.

Tin, ka hman lo tia kan sawmna hnar fo thinte hian an tan kan pawimawh vak loh thu "Indirect" taka min hrilhnaah ka pawm hmiah mai thin. A ni reng lah tak a. Phut chhuah ngai fo thian kan nei thin em? Kan tana thiantha tling te chu hun min pe phal fo thin tu te chauh hi ni awm tak an ni. Mi pangngai kan nih chuan a zawng zawngah kan thiante hi an puihna kan phut kher thin lovang a, a tul thilah tak tak lo chuan kan ko thin awm love. Chuti chunga chhuanlam nei fo thin te ah chuan rilru kan siam thiam a tul khawp ang. Mihring khawsak a inchen loh avang erawhin hun kan neih dan a inang thin lo fo. Hemi kawngah erawh hun leh hmun thliar thiam a pawimawh khawp awm e.

Chet hleka thiante lam chul pawl pawh hi awm ve theih tho a ni a, a phunchiar chiar hi an ni duh leh ta nghal a. Chutiang mite erawh chu ninawm an chang thuai thin. In thianthatnaah hian ram ri kham theih a ni kher lovang a; amaherawhchu awm leh mawi zawnna kawngah erawh huang lo a awm kher bawk lovang. Tam tak te hi chu mihrang te chunga ngilnei em em, thatchhuah bang lo; mah se, thiante chunga ui kawlh ang maia vin leh hle thung thin an awm thei. Kan hnaiha khawsa te chunga that chhuah nachang kan hriat lova, lam hla zawkte chunga kan ngilneih em em ringawt hi awmze nei lo a ni ang. Piputen, "Thenawm te do aiin khawsarih do a thlanawm zâwk," an lo tih ang maiin kan ngamtlakte an nih avanga kan hnaih a awm, kan thiante kan hliam fo hi a tha lo hle.

A thente thung erawh chuan thiante an ngainat luatah ngaihzawng an ngaihsak loh phah a, an "Single" rei duh phian letling. A thente chu ngaihzawng an nei ta cheng a, a zawng zawngah an thiante an thlauhthla ve daih thin thung. A tawpah tak tak erawh an thiante tho an pur leh thin. Thiante hi an hlu a, thiantha phei chu an hlu lehzual. Thiantha kan tehna te pawh hi a inang lo zul awm e. Inthianthatna tak tak ka tehna chu chhungril taka inzawmna chauh hi a ni. Tui zawng in ang, duh zawng leh khawsakna thuhmun vang ngawta inkawmah te hi chuan insawithiamte hi a țul fo chang a awm a; thiantha takah chuan kan thiamthu hi sawi fo pawh a țul kher thin lo.

Naupang pakhat a awm a, a hming chu Sawmi a ni a, naupang fel tak a ni. A harhvangin a hlim thei em em a, a sikul kalnaah pawh a lar hle a, lehkhathiam thei tak pawh a ni. An khawsakin a zir bawk a, a birthday lawmna buatsaihah te chuan an Class zawng zawng a sawm thin a, thilpek te pawh a sem thin. An Class-a naupang awm zawng zawng chu a be tha vek a, an chungah that a chhuah vek thin. Kawm bik a nei lova, a phek en vek a. Chumi avang chuan an nel hlawm em em a ni.

Ni khat chu Friendship Day pualin an sikulah chuan hotuten Program an buatsaih a. Thiante hnena duhsak thilpek hlan vek tur a ni. Sawmi chuan an Class naupang zawng zawng daih thilpek tur a keng a, a sem vek a. Mahse, thilpek pakhat mah a dawng let ve hauh lova. A lungchhe em em a, rilru na in kil khatah a thu a, a tap keuh keuh a. A thil lo tih tawh thin te a ngaihtuah a, thilpek dawn let ve ngei chu a phu hle niin a hria a, mahse pakhat te pawh a dawng si lo. Mak a tih ai mahin a rilru a na zawk a. Nakinah chuan miten an lo hmu a, an hnem ngial a, mahse, a rilru erawh a dam thei chuang tak tak lova. Lunghnur takin inah a haw ta a.

A lungchhia chu dawhkan bawhin a mittui a luang ngiai a. A nu hnenah chuan, "Nu, khawiah nge Thiantha hi kan tawn theih ang?" tiin a zawt phawng a. A nu chuan, "Bawihte, thiantha chu tawngkam tha leh thilpek ringawt chuan a hlawhchhuak zo lova. Inpekna leh ngaihsakna hian a hlawhchuak zawk thin a ni. I thiantha tan chuan eng hunah pawh hun i insiam hram hram thin tur a ni a, hlim leh lungngaih hunah pawh an kianga awm thei reng turin i inpeih tur a ni." tiin a hrilh a.

Sawmi chuan, "Mahse, mi zawng zawng hi thiantha atan ka duh vek a lawm. An kiangah hun hman vek ka duh a, ka kawm vek duh a lawm," tiin, a nu chu a hrilh a.

"Mamte, mi zawng zawng hi thiantha leh thianhnai ber te an ni vek thei lo asin. Mi zawng zawng tan hun i nei seng vek ngai lovang a, mi tlemte hnenah chauh hun i pe thei chauh ang. Chung mi tlemte chauh chu thiantha leh thianhnai te chauh chu an ni zawk ang. A dangte chu thian an nihna a bo chuang lovang a, mahse, thiantha erawh an ni thei kher dawn lo a ni." tiin Sawmi nu chuan a hrilhfiah a.