Naupang a bîkin sikul la kal rual chiah lo te hi nu leh pa te tan enkawl thiam a țul lehzual khawp mai. Khawvel changkang chho zelah mite hi kan lo țul chho tawh viau bawk si a. Damchhung khawsak leh eibâr zawn ngaihtuaha chhuah fo a țul si avangin nu leh pa tam tak te hi chu hna thawkin an chhuak ve ve ta țhin a, in lamah duh angin hun an nei thei țhin lova, an fate bulah hun an hmang tlem thei em em a ni. Awmpui te kutah fanau rochante an țul em avangin an dah fo a, kawng lehlamah chuan a țhat rualin, a țhat tawk lohna laite pawh a awm thei tho bawk.
Țawng thiam tîr leh lawm hlawh zual hunlai; sikul an la kai hma hi nu leh pa te hlim lai tak a ni a. Khawvel sualna lak a ta an la fihlim bawk si nen; nu leh pa te tan a zangkhai a. A lehlamah chuan nun bulțhut leh zirna an mamawh hun lai ber a ni bawk. Heng hunah hian engkim an zir kan ti thei ang. An hmuh leh hriatte chu an tan thil thar vek a ni hlawm a, zawhna siam thiam vek țhin lo mahse, zawhna hlirin an khat thung a ni.
An khawvel chu thil thar hlirin a khat a. Khawvel tukverhah bangbo takin an dak chhhuak a. Mal takin an awm a, engkim an daidar duh a, an chhehvela thil thleng leh mi chi hrang hrangte chu hriat chian chakin an tuihal em em a ni.
Heng hunah tak hian nu leh pa te leh an bul vela mite hian mizia leh nunphung țha kan zirtir tam tur a ni a, nungchang mawi leh ngaihdan țha neih dan te pawh kan hrilh fo tur a ni.
Pre-School-a kai tir hian kawng tam takin naupangte hma a sawn tir a, harsatnaa khat leh hriatthiamnaa tuihal mekte tan hian Pre-School hi an mamawh em em a ni. Inrintawkna țha tak neia an țhanlen theih nan te leh khawvel finna mil zela an rilru an hman țangkai thiam theih nana an inzirna hmun hmasa a ni.
Chutih rual erawh chuan a tam zawkin, Pre-School-ah kan fate kan dah vek thei lo ang a. Anganwadi te pawh sorkarin min siamsak tho a. Hengah te pawh hian kai tir a țha khawp mai. Ina awm satliah ringawt hi a tawk zo lova. Rual pawl an mamawh em em chu thuhran nise, rual el thiam dan an mamawh em em bawk a ni.
Tin, in lamah pawh nu leh pa te tan mawhphurhna sang tak a awm a. Lehkha thiam leh thiam loh lam pawh a ni hran lova, kan nitin nunphung leh khawsak dan ațangte pawh hian zir tur tam tak an nei a ni.
Ahnuaiah hian a indawtin han dah ta ila:
1. Naupang khuahkhirh leh thununnaah hian kan chiangin kan rinawm em em tur a ni. Pawimawh ber ta chu zirtirna kan pek leh zawm tura thu kan pek te chu keimahni pawhin kan zawm ve ngei tur a ni.
2. Fate zai ngaih thiam a țul a. An zawl tawk milin kan insiam rem fo țhin tur a ni. Kun hniam emaw țhutpuia tîtî pui țhin tur a ni. Tin, kan pianphung intiat lohna kha dah bo hram hram tur a ni.
3. Kan ngai pawimawh a ni tih lantir nan an thusawi lai reng rengin an mitah tak kan en țhin tur a ni.
4. Kan fiah fo tur țhin tur a ni a, an hriat thilte kan zawt nawn țhin tur a ni. An tui zawngte pawh kan sawipui fo tur a ni.
5. Zawhna an siamin kan ngaihthlak sak ngei ngei tur a ni. An zawhna chu mawlmangin ho lam viau pawh nisela kan nuih sak tur a ni lo.
6. Kan hnathawhna leh thil tihnaah puih kan ngaihin an puihna lak hreh loh tur. Min puih an tumna kawngah reng reng khap loh a țha. Mawhphurhna an hriat thiam phah țhin zawk a ni.
7. An țhiante nena an infiam leh intihsiak ni khua in, phur pui thiam a țha.
8. Tin, țawngkam mawi leh dik hmanga biak țhin tur a ni a, hei hian mi biangbiakna kawngah a puih ngei dawn a ni.
Fa la nei ve îk lo hi ka kam tam phian mai a. Nu leh pa te mawhphurhna hi a sang em em tih hi a thu chauhin kan hria a. A tak ram erawh kan la hre thiam pha ve bawk si lo. Mahse, ngaihdan leh rin dante chu zam a thiang tho ang chu. Heng kan sawi tak te pawh khi a dikin, țha turah ngai ang. Nakinah kan la hre chhawm ve ang chu. Hahah
No comments