Vawiin chu ni 100 inhlawhnaah ka thawk ve a. Dar 9:30 ah innghah khâwmna hmuna kim tur tih a ni. Tiang-thir tê fel ât kengin dar 9 velah in ka chhuahsan a. Tûnhma a ka thawh ve țhinna sikul kawtah kuhva leh zial ka lei a. Dawr neitu hi ka hmelhriat a ni a, ka chhuah hma thu leh hmanhmawh a ngaih lutuk loh thu min lo hrilh avangin țhiante inah țhut khawmuan ka rilrûk leh rih a.
Ka lêt leh lamah chuan sikul kawtah naupang ho chu an lo dingkhâwm nual a. Ûksâk lêm lovin ka pêl mai a. Hnunglamah chuan mipa naupang aw hian, "Helper a ni tawh" a lo ti var a. Nuih a ti za angreng khawp mai.
Private Sikul zirtirtu ațanga ka chawlh hlim hlawtin chu ka thawhna thin sikul piah maia thawmhnaw dawrah thawmhnaw ilo fahran khaina siamin ka inhlawh fo țhin a. Ka naupang hluite sikul bâng chuan min hmu nitin țhin. Zînglamah erawh hna kan thawh țan hi a tlâi deuh avângin ka nang hman ngai lo hlawm a. Tlai bânah erawh min pel zut zut thung țhin.
Nuih ti za bang lo lêkin min be hlawm țhin a. An zirtirtu hluiina bazar laia hna kan thawk țhin ta thut chu a tê zual lam chuan min lainat em em mai a, min khawngaih ngawih ngawih mai a ni. Ka hmuh hlau si hian an mit sîrin min melh ngam țâwk a, min hel hram hram bawk a, ka hmu lo der ringawt ta țhin zawk a. Ka nui ru kûrh kûrh țhin.
A lian zual lam, pawl sang zâwkte min biâk țhin dan lahin nuih a ti za zual a. "Sir, inhmeh tawp," "I van fel," "Khawngaih tawp," "Thiam ve hmêl," "I van taima," etc... Hnathawk e ti lo hian ka nui nasa thei khawp mai. Tin, min be lem lo te pawhin min pelh hnuah ka chungchâng tho an sawi a. Min lainat thu ringawt hi an titi tui ber a ni. A țhen ka hunlaia min nêl zualpui ho lahin min han kâp ve angreng lawi bawk a. Min ngaina vak lo tu te pawhin awmze nei fahranin min han fiam ve leh zuk țhin.
Ka sawi duh tak zâwk chu naupang rilru thiânghlim zia hi a ni. Keima bîkah chuan tling lo leh thiam lo tak chungin zirtirna leh nundan țha kan zirtîr ve a. Eng emaw ti zawng tak chuan mahni te pawh hi naupang te zârah a ber emaw in tih a awl țhin khawp mai. Thinchhe bawk si chu nâ, vîn leh vuâka hrâwm chân ka ngah em em a. Mahse a hnuah mahni lam ka in en lêt leh fo țhin a, duhsak leh țhahnem ngaihna vang ni țhin mahse; țha ber, tling ber, tlâk ber leh dik ber ni'a inhriatna min ngaihtuah tîr a. Ka tlin lohna min haider sak fo țhin tu te zâwk hî, eng vanga vuâk leh vîn hmanga khalh fo țhin nge ka nih? tih hi ka inzâwt lêt fo țhin.
Naupangte hi zilhhau ngai an ni na meuh mai. Zirtirtu nihna zâwn ațanga teh chuan fîr tak leh khauh taka kaihhruâi tur a ni rêng lah tak a. Mahse, hleihluâk leh chungtlâk, diriamna tel hauh lova zilhhau chu a dik lo bur. Naupangte dikna chanvo hi humhalh a țul takzet a, hlau leh thlabâra naupang siam hi dan kalhna a ni.
Lunglên châng a tam ruâlin, zirtîrtu dinhmun hahthlâk zia ka zir chhuak a. Abikin Private sikula thawkte hi an fakawm țhin ka ti. Hlawh khawp-kham loh a na em em a, chutih ruâlin sorkar zirtîrtute aiin an hah ang lawi a. Kan sorkar te pawh hian ngaihven deuh se la, tun ai hian an hnaah inpumpekna an nei zual sauh ngei ang. Zirna in hma a sawn anga, Human resource lamah nasa takin kan hausa ngei bawk ang.
No comments