Maxican mi kum 41 a upa, Aceves hi natna dangdai tak "Hypertrichosis," "Werewolf Syndrome" an tih bawk natna chu a vei a. He natna hi a mak dangdai khawp mai! Taksa leh hmâiah hmul a țo chiâm mai a ni.
He natna vei chhinchhiah tawh hi mi 50 an awm a. Mi sawm leh pasarih; mipa 7 leh hmeichhia 6 te chu chhungkaw pakhat ațangin he natna hi an vei a. Hemi chhungkua te hi Loreto an tih khua, central state of Zacatecas a chêngte an ni.
Chumi chhungkua ami pakhat chu Aceves, "Chuy" ti'a an koh hi a ni. Khawlai chhuah a hreh thei em em a. A nun chu hrehawm takin a hmang țhin. Naupangtê anih lâi ațang tawhin, "Engvângin nge Pathianin hetianga min siam bîk? Engvângin nge ka danglam bik?" tiin zawhna a siam fo țhin. Kum tam tak chhûng chu khawlaia a chhuahvah nikhua pawhin, hmai hup chung hlirin a kal țhin a. Sikul kal a hreh phah a, a bâng ta nghe nghe a. A chhan chu a țhian ten an nuihzat țhin vang a ni. A nun beidawng lutuk chuan kum 13 mi lek a nih lai ațangin zu in a chîng ta a, kum tam tak zu ngawl veiin a awm zui ta a ni. Mahse, a nun thlâk danglamin circus lam a buaipui ta a. A unau pahnihte sawmin ni khatah $8 hlawhin an inpho chhuâk țhin ta a ni.
Hypertrichosis natna hi inthlahchhawn theih a ni a. Sam leh hmul țo chiâm tih bâk chu nghawng dang țha lo a thlen lem lo. Mahse, mihring nunphung erawh a ti khaihlak em em thung si. Mi te mak tih hlawh bâk dang beisei tur a awm lo; hna, țhian leh ngaihzâwng lamah harsatna a thlen tih mai loh chu. Chu ringawt pawh chu mi pangngai tan chuan harsatna lian tham fê a ni. "I danglam bîk avâng ringawta hamțhatna pek i ni ngai lo hi ka hrethiam thei lo; mahse a thleng ngei si. Rin harsa ka ti takzet." tiin Aceves chuan AFP in an kawmnaah a sawi.
No comments