Ka mittui a parawl!

Mi hmaa thusawi hi thil har tak a ni ngei ang, tih than a awm thei lo an ti. Ziah sa han chhiar chhuah mai pawh hi mi tam hmaah chuan thil awl-ai tak a ni chuang hauh lo va. Tin, thusawi tura inpuahchah pawh hi thil na mai lo tak a ni a. Thu tha tak chu thluak fim leh rilru sawrbingna rah chhuah chauh a ni a. Eng thu pawh ni se, mi hmaa sawi tur a nih phawt chuan a lo ngaithlatu tur lam pawh ngaihtuah tel ngai a ni a. Tin, a sawichhuah danin a zir pawh a tul a, a sawitu'n a thusawi milin a chethmang a thawh thiam pawh a pawimawh tel.

Zak thei lo ve hrim hrimte hi an awm a. Tin, tawn chawpa chi-ai hauh lo leh, mipui huhang ngam ve chi hrim hrim pawh an awm. Kohchawp thusawi mite pawh an awm leh zel a, mihring hi kan inthlau thin ngawt mai! Heng mi te hi awhawm tak an ni. Tawngkam thiam em em te hi an awm a, thu tam tak an sawi thei a. Fiamthu thawh thiam tak te pawh hi thusawi thiam fe fe an ni duh khawp!

A enga pawh chu lo ni se, thusawi hi inzir thiam theih a nihna chen a awm ka ring a. Mi hmaa din tam hi a pawimawhin ka ring. Mi hmaa din chu tih than pawhin kawngro a su teh chiam lo, an ti thin a. Ka ring lo. A ding tam tam zawk te hi a thiam thiam an ni zawk.

Mi zakzum tan chuan mi tam hmaah buai a awl zual a, zak takin an ding thin. An chet a lai vek a, an khur ti tih hial thin a. Mi thenkhat chuan chuti ang hunah chuan kan zak em em a, kan khur a, kan chet a khawr vek a ni tih hi mipui tam zawk, an vai pawhin a ni ang, min hriatpui phak tak tak lo va, chuvangin zak lo ang taka lan tum zawk tur, an ti thin. Chuti rual erawhin inthup tum luat vanga chet phar phar tur tihna lam phei zawng a ni hauh lovang.

Thusawi thiam tak tak te chu han sawi dawn ngat ila, mi tam tak te hming lam tur a awm ang a. A hrim hrim thuin mihring rilru leh ngaihtuahna, tha tihzawng leh ngainat zawng te a inang tlang vek thei  lo va. Tha kan tih kha midangte tha tih zawng a ni lo ve thei a, tha an tih ang pawh chu kan tha tih zawng a ni lo ve thei tho bawk.

Mi pakhat han sawi ve ka duh a, thusawi thiam tih tur a ni lo va, thusawi mi pawh a ni kher lovang. Nu pakhat ve mai a ni. Mahse, chu nu thusawi lai han ti ila, lawmthu sawi a ni zawk a, thusawi pangngai a ni lo va. Chuti lai chuan ka mittui a parawl ve tlat a. Thuthmunah sakruanga hliam awm hawt si lovin ka intuaihnam ve ngei chhap a lawm.

Chu nu chu pi Lalrinsangi a ni.

June 20.2015

Sana ka bih a, 10:30 p.m a ni a, ka T.V en lai channel chu Zonet a ni. Zosangzuala (Red Wheelchair) lehkhabu tlangzarh inkhawm buatsaih a ni a, Pu P.l. Liandinga'n zangkhai takin hun a kaihruai a, nuihna tur a tam hle a. Thusawi kar laka Lalduhsaki zai chu ngaihthlak nuam tak a ni. Hun a kal zel a, a tawpah lawmthu sawina hun hmang turin lehkhabu ziaktu hringtunu, pi Lalrinsangi chu a rawn ding chhuak a. Lawmthu a thiam ang tawkin a han sawi a, a lungchhia chu a insum hlei thei lo va. Lawm avanga a mittui lo luang chu a hru hneh mang lo va, a thusawi te chu a tluangtlam lo ti tih a. A tlingtla thei ngawr ngawr a. 

A lawmthu sawi lai hian midang, a hmuna entu awm ve te pawh chuan an mittui an dang hlei thei lo va. An lawmpui a ni tih lanna a nih ka ring a, rawmawl an lek fur hlawm a. Kei tak pawh chuan thinlung takin a thusawi chu ka lo en ve a, ka mittui a parawl hial a. Ka hnuk a ulh ve deuh reuh a, ka lo en ngun hle a.

Miin, eng thil pawh thinlung taka a tih chuan kan lo 'feel' ve theiin ka hria a. Lawmthu sawi pawhin an thlenna te chungah kher lo pawh, thil tam tak a thawk thei a. Danglamna nasa tak a thleng thei hial a ni. Chutiang avang chuan keipawhin kha nu lawmthu kha thinlung taka sawi a nih avangin ka lo 'feel' ve a, a lawmnate, a mittuite leh a rilrute chu ka lo tawmpui ve niin ka hria.

A thusawi kha hriat zui tur emaw vawn zui tur a awm ka hre lo va, a mittui luang khan a thinlung tukverh a hawng tih ka rinnna khan, bengah ni lovin ka thinlungah thu tam tak min hrilh thung.

Zosangzuala (Red Wheelchair) hi mizo zingah, a bikin pianphunga rual banlote zinga damlai lung pawimawh tak phuntu a ni a. A ngaihsanawm a, entawn tlak mi tumruh a ni. A chhel a, a paukhauhin hma thlir thiam, mi huaisen a ni a. A damkhua sei se la, mite cho phurtu niin malsawmna dawng zel turin duhsakna ka han hlan ve a ni.