Thingdelh loh lungdelh loh nafam chu kan la dam sen ve ang lel hlawm a. Mahni țul țulin kan țul ta hlawm a, kan buai tlâng ta viau a nih hmêl tâ e. Biak pawh kanin be pawh hman meuh tawh lo.
Zir finna muala kan ke pen chin inrual khâi tawh lo lutuk te hian kan ințhian țhatna hi a chhiât ang tih ka hlau ngawt mai. Mahse, a zir sang ho na na na hi an lo fel a, keini ang zîktluak lo ho hi min la thlauhthla duh bîk dêr lo.
Mâwl taka kan khawsak ho laite, inti fing taka eng eng emaw kan seprawtui laite, lungrual taka sual kan hrawt ho laite leh eikhâwm kan siam țhin lai zawng zawngte kha han ngaihtuah a, han chhui kir hian lung aleng țhin khawp mai.
Zin chhuah ilo vela buai fal thei êm êm mai thin kan thiannu Rd-i pawh rumlum nuthai changin chunnu a chang tawh a, fanau maltluan chawiin buai takin a fate a tulpui tawh a. Kan lawmpui rualin la nula se, han zin ho leh te pawh a chakawm hle thin a. Mahse a rem tawh si lo a ni. A fate pawh an hmel a tha phuk hlawm mai a, an duhawm hlawm hle. Thianho kan han awmkhawm chang hian a nui ring thei em em mai a, fiamthu a lawm a, a bula awm kha a nuam em em a ni. Zawhna awm thei chu hun han nei ila, eng ti ti in emaw han inhmukhawm leh thei mial ila, chuti ang hunah chuan a mize pangngai ang kha a la pu a ngem tih hi englai pawha buai reng țhin; thu fahrah tê tê chinfel awlsam zet si, a punlun zâwnga sawi hluam hluam țhin Janet Liani han zâwt ta thut ila, a hria angem?
Lo hre lo tâ se, nulât lâia chhungpuinu ang hrima chê, inchei peih mi leh buai thei êm êm Janet Têi tal hi a hun chêp tak karah kan ko lawm lawm mai dawn em ni ang.
E khai, mi tîtî kotlânga lo nui leh ver ver thin. Sawi tur a hriat țum a, kam tam ve țep țhin Ziri pawh khâ hmâ a lo sâwn tawh hle a ni awm e. T.V ah pa râwn leh puitling thluâk dai tawh ho chin hlir a ni, a kawm vei zet zet tawh ni. Zakmawh Rinfeli hi eng tin tak khawsa ang maw? A thusawi hi sawi nawn tir a ngai ziah pek a, a sim a tha khawp ang. An vêngin a zir êm a, chân loh khânah thu ril leh fiamthu ril tak tak sawi khurh a chîng reuh tak kha le.
Rilru pawh hi a nei ve lo anga tih tur ang chi, thlamuang leh engthâwl êm êm mai; Thawveng khuaah pawh bazar vêng ngata chêng a ni ngei ang tih theih nghâl mai tur Mafeli hi ngaihzâwng zawn lamah chuan a buaipui awm loh ber țhin tak kha a. A țhiannu, a rûka lêrh êm êm; ngaizâwng leh inchei buaipui mî, thluâk fîm ru zet, lang miah si lova hmang thiam êm êm Hruaii khâ a la tlânchhia in, a la biru zuk zuk thin a ngem aw!
Upa Lawma pawh puithû takin a puithu theihna hmun ngei maiah a zirlãi, puithû taka a zir achinah zawng Facebook pawh a khawih hman ta meuh lo. Ani hi zawng thu thiam ngang a ni a, a thluak a fing bawka eng kawng pawh zawh se a ngaihtuahawm loh khawp ang.
Phone hmang thiam êm êm, a țangkaina tak zuk pawh pha leh phûnglûng leh zauh țhin Rowlance-a pawh hî a lo fel tawh lo tawp niin a lang. Damdawi ei mî tih takah damdawi pawh a kawl chikim teh e. Engkim hi an țangkaina zu hmu thiam pha tlat hek le. Ani ti ti nuam ti mi a ngang a ni a, eng eng emaw hi sawiin a tui thei em em a, a lawmawm ang reng.
Kei chû ka la hmêltha tluâng zêl e.
No comments