Mi ropui leh neinung hrin ni ta lo chu naupan lai atang rengin ka inkiltawih tan tawh a. Thiante zingah pawh inthlahrung takin hun ka hmang nitin mai thin. Naupan lai chuan thiante nena intihthiam loh chang te a lo awm thin a, chuti ang hunah chuan ka pa hian ka thlavang a hauh ve ngai lova, chu a hnehin min hau ziah thin zawk a. Insual hi a rem ti lo bur a, kan thiam leh thiam lohvin a rilru a hmin lova, kutthawh hrim hrim hi a phal lo a ni. Chumi vangte chuan buai hi ka duh lo thin a, min han tihluih ngang ngang pawhin ka insum thei mai thin. Ka pa ka venthawn avangin.
Ka rualpuite leh min rual pha chiah lo te pawh chuan min zuam phah em em mai a, min chhaih lui ngat ngat tawk lah an bo hek lo. Kei lahin ka pa rilru ka vawn khiau avangin thinrim teuh chung pawhin a theih chhung chu ka dawh ve ngat ngat thin. Mahse, mihring ve tho ka nih avangin insum theih loh chang pawh a tam mai! Ka pa lahin kan buaina thu engah a ngai thin lova, hauh ka pum pelh ngai chuang lo, ka thiamthuah ngat pawh! Chu chuan min titim a, mipa naupang mah ni ila, ka insum ve thei khawp chuan ka hre thin. A thente chuan dawih te pawh min lo ti a ni awm thin a, ka pawisa vak chuang lova. Mahse, ka sikul kalna leh kan class-ah chuan a pangngai pawl tak chu ka ni ve tho thin.
Naupan zual deuh lai khan a hrehawm zual a. Kan harhvang a, kan tawng phawng phawng a, thiante han tih luihte kha a nuam thin. Chutih lai chuan keipawh hi min tilui nasa thin em em a, min chhaih awl lova. Ka pa ka venthawn avangin ngawih ka chuh mai chan a tam mai! Insum reng renga nun han hman chhoh chu eng emaw ti zawng tak chuan a lo tha hauh lova. Insum theihna hi thil tha tak pawh ni mah se, a lutuk chin chu eng thil mah a tha thei lo a ni. Inrintawkna te hi ka tlakchham phahin ka hria a, thutlukna leh ngaihdan han siam zung zung te hi ka harsat phah thin. Tin, mahni ngaihdan rin tawk lohna pawh ka neih phahin ka hria a, midangte ngaichang reng rengin hun ka hman phah thin. Chu chu ka chak lohna pakhat a ni. Midangte mitmei ven leh lutuk chuan kan tana tha leh kan duh zawng pawh kan chan phah fo thin.
Hun leh ni te liamin kumte an lo vei a. Thing delh loh lung delh loh na fam chu kan dam ve zel a. Rilru pawh a lo puitling tial tial a, taksa te pawh a han thang lian chho a, ngaihzawng neihte kan han hre tan a. Mi fa te angin hmeltha ve lo mah ila, tum tawk te chu an bo ve chuang lova. Rawllai nuna hmangaihna piang thin chu kan tawng ve a, a nuam ve ngang mai thin a. Mahse, kei erawh inkiltawih bawkin ka hun ka chhiar leh thin. Ka thanhnan tawh hial niin ka hria. Ngaihzawngte pawh han nei ve thin mah ila, natna min thlentu bak an ni leh dawn chuang lo tih hi ka thuvawn a ni a. Rilru hlim taka ngaihzawng an han nei thei te chu ka awt thin a, an kar thu chhiat vanga inthen ta te chu rilru na in ka hmu thin. Reiloteah an ngaihawh ve leh mai a, rilru tharin midang an tawng leh a, a hma ang thovin an hlim leh thei. Kei chu chutiang chuan ka awm theih ka ring lova, ka rilru zawng zawng ka pek thin avangin dan pangngaia inthen ni a lo thlenin ka tuar thiam thin lo, mite angin. Chuvangin ngaihzawng han neih te pawh chu nuam ka ti thei tak tak lova, thian pawh ka kawm em em lo. Mi pahnih khat te emaw chauh hi ka kawm bulfuk a, rilru zawng zawngin ka kawm thin thung. Ka thikthute hi a chhe em em a, a hrehawm letling zawk.
Mahnia tlat chet chet hi nuam ka ti a, a nih loh chuan ka thian kawm thin te chauh ka pawh thin. A pawng apuiin midangte kianga tal ve hi a nuam ka ti tehchiam thin lo. Rawlthar kan ni a, a lehlamah mahni chauh emaw, thian kawm bikte chauh bulah a lo khawsak theih lova, chutiang hunah chuan mi zingah ka tal ve thin tho. Thiante leh hmelhriatte chu an awm teuh lo thei lova; mahse, mahnia ka awm chet chet hi a tam zawk mah ang. A khawhar mi ka lo ni vei nen, rimawi lam hi ka ngaina chhova, zai ka ngaithla nasa em em a, ka inawm tleina pakhat a ni. Tin, lehkha chhiar hi zirlai a nih loh chuan ka ngaina ve a, mite angin kan chhiar nasa em em chuang lovang a; mahse, ka chhiar ve zeuh zeuh thin. Chutiang chuan ka khawsa a, hla han ngaihthlak te hian ka la lungrun thei em em a, a ‘Mood’ ah ka cheng thin. Tichuan, hla ka han ngaihthlak fo takah chuan he hla hi ka chhar ta nawlh mai a, chu chu - Kenny Rogers an thiam tak maia a sak ‘Coward of the County’ hla ngei mai hi a ni. He Country hla hi Roger Bowling leh Billy Ed Wheeler ten an phuah a ni a, American Country Music singer ropui Kenny Rogers sak lar tak a ni.
He hla hian a hunlai chuan Billboard Hot Country Singles Chart-ah pakhatna a hauh vang mai a. Tin, Cash Box Singles Chart-ah te pawh pakhatna dinhmun chelhin, Billboard Hot 100 Chart ah pawh pathumna a thleng pha hial. Chu mai ni lovin UK Singles Chart-ah leh zel pawh pakhatnaah a inhlangkai pha hial bawk. Tin, ram dang leh hmun dang dangah te pawh mite ngainat hlawh ber pawl a ni.
TOMMY
Wild West hunlai khan mi pakhat a awm ve a, a hming chu Tommy a ni. A khawvel chu hmuhsitna leh diriamna hmun mai a ni a, engtin hringnun hmang ve zel tak ang maw?
Mite hmuhsit rawn leh diriam, “Yellow (Dawihzep)” ti’a an chhaih thin, inthlahrung reng renga hun hmang thin Tommy chu kum 10 leka upa a nihin tan-inah a pa in a boral san a. A nunkhua chu a pa nen hmunkhatah, damchhung hun chhiarin hringnun hmang ve ila, dam man te pawh a awm deuh mah na, tiin a ngaihtuah ve rauh rauh thin ang. Mahse, khuanu remruat dan a ni si lova, hriatthiam a va har dawn teh reng em! Tommy tan ngat phei chuan. Zawhna tam tak a rilru-ah a awm ve thinin ka ring a ni. Ni e, Tommy chu vanduai tur renga ruat bik tihna em ni dawn le?
Mihringte hian kan hma hun kan hre lawk hauh lova, kan chunga thil lo thleng te hi kan duh dan ni vek thin lo mah se, kan pawm thiam a tul thin a. Tommy pawh naupang te a nih lai atang tawhin a patea kiangah a khawsa a, a pa jail-a khung a nih avangin. Tichuan, a pa kiang lovah a thanglian a, a pa erawh a hre reng thin. Tin, a patea pawhin a duat em em a, fa tak ang maiin a enkawl a. Hun inher zelin Tommy pawh a changkang chho tawh hle a, kum sawm lai a ni ve ta a. A pa kiang lovah chuan kum tam tak a hmang tawh a, a patea pawh a ngaina hle tawh a. Mahse, a pa erawh a theihnghilh thei chuang hauh lo. Hun liam tawhin vaw let thin mah se, a patea thlazar hnuaiah lungmuan takin a thianglian chho a. A pa erawhin humsual a dai palh a, a hringnun a danglam phah hial a, a fapa nena inthenna dar a lo rik phah ta hial reng a ni.
FINAL WORDS
Hmun thim leh tihbaiawm, thiamloh changte dahkhawmna hmun chu tan-in a ni a. A ni, chu hmun ngei chu Tommy pa khawvel chu! Tommy pa chuan a hun tawp lam a hmang mek a ni tih a hai lova. A nunhlui a han chhuikir a, a biangah mittui a lo luang a. A vanglai hunah nun a lo uluk tawk lova, chu chuan a khawvel a thlak danglam sak ta a ni tih a hai lo. Inchhirna hlirin a khat a, siam that theih a ni tawh si lova. A tawrh chu tawk viauin a hria a, a fapa khawvel chu inchhirna tel lo ni se tiin duhthu a sam thin. A fapa tana tih theih a neih tlem zia a ngaihtuahin a na vawng vawng thin.
Hun tam a nei tawh loh tih a hriatin a fapa Tommy chu a ko thuai a. Chu tan-in hmun nelawm loh zet chhungah chuan a fapa nen chuan an in hmu ta a. Chu hun chu a ni kum tam a lo nghah tawh ni. Tap chungin a fapa chu a kuah a, “Ka fapa, ka hun chu a liam dawn ta, nang erawh a intan dawn chauh a ni,” tiin a phun mawlh mawlh a.
Rei fe ngawih a chuh hnuin thut hmun a rem tha a. Inti pachang lui hram hramin a fapa chu a en a, “Ka fapa, ka hun tawn ang hi tawng ve turin ka duh lo che a. Kei chu ka dam hun chhung a rei dawn ta lo. He tan-in hmun khawhar leh hrehawm hi ka khawvel a ni a. He khawvel ang chhunga min tir liamtu chu insum theihlohna hi a ni. Ka fapa, insual buaina lak ata inthiar fihlim zel hi chaklohna a ni ngai lova, insum theihna rah chhuah zawk a ni. Ka hnung rawn zui lo turin ka duh che a, mipa kan nih avangin buainaa inhnuh luh kher tur tihna a ni lo asin. Insum hram hram zel hian mi a venghim thin ngai.” Aw chhuah tur a lawi a nei ta lo. A chau takzet tawh a ni. Ni e, khami ni kha Tommy an a pa a hmuh tawpna ni a ni.
TOMMY'S LOVE WAS BECKY
Hun leh ni te lo ralin kum te a lo vei zel a, Tommy pawh a thang duang chho hle a. A pa thuchah kha a vawng tlat a. A rualpui tena bar-a zu no an dawm tlut tlut lai pawhin ani chuan hna thawkin a buai nileng thak thin a. Hunawl nei hman lo khawpin a tal buai a, a taima em em a. Ran enkawl, thlai chin leh a tul dang awm apiang phur takin a thawk mai thin a. A buai nileng nitin reng thin a ni. Rual a pawl lova, a duh bawk hek lo.
An khawtlang nunah erawh mipate chuan puakruk chelek an thiam viau tur a ni ber mai. Puakruk hmang thiam chu mi te ngaihsan an ni a, nulate ngaihzawn rawn niin, vantlang chunga leng ang mai an ni. Insual buai vel chu mipate huaisenaah an teh a, in lam hna erawh naupang leh hmeichhiate hnaah an ruat thung a.
A huaisar zualte chuan puakruk chu fual takin khelah an pai a. Bar-ah an chuangkai nitin thin. Zu leh sa nen khawvel chu an chen a, chu chu mipate nihphung tur rengah an ngai bawk a.
Chutiang khawvelah chuan Tommy te ang inlum chhuahsan ngai mang lo leh, in chhungkhura tawmim thin tlat ta chu a rualpuite chuan mipa nunphung pawh phak lo leh buaina chinfel kawnga ke pen ngam lovah ngaiin an hmusit hle a. A mipui mimir pawhin tuai lam pawlah an ruat a, an diriam hle ringawt a.
Mak tak maiin chutiang khawvel karah chuan Tommy chuan kawppui a tawng ve nawlh mai a. Tommy tan chuan a va hlu dawn tehreng em! A nih ang anga pawm thlaptu leh hmangaih em em tu chu Becky a ni. Becky hmaah chuan puakruk chelek thiam kher a tul lova, insual thiamin awmzia a nei chuang lo. Hmangaihna chauh chu a tawk a ni.
Tommy chuan Becky chu thinlung takin a hmangaih a. A tan chuan engkim a huam a ni ber. Becky paw’n a ring em em a, mi te hmuh loh phena Tommy chhelna chu chiang takin a hmu a ni. Nupa hlim thei tak pawh an ni reng bawk.
GATLIN BOYS
Hlim leh lawm taka hun an hman lai mekin ni khat chu, ran rual chaw pein Tommy chu a buai em em a. A mitthlaah erawh a hmangaih Becky nui sen sen lai a awm thung a. Khat tawkin a khi leh sak thin a. A hna a zawh fel hnu chuan hlim takin in lam a pan a. Kawngka chu a lo in hawng ruau mai a. Ngaihthat lohna pawh a nei chuang lo. A hmanruate pawnah a dah fel hnuin inchhungah a lut a. Mahse, a rin loh leh beisei loh thil a thleng ta tlat mai le! Becky chu kil khatah kawr thler hnuangin a lo tap hlawp hlawp a, chu thil chuan a thawng takzet a ni. A tlan a, Becky chu puan a sin tir thuai a. Becky chuan thil awmzia a sawi kher a tul lo. Sawi tur pawn chakna a nei bawk hek lo.
Tommy chuan aw reng a chhuah thei lova, a biang chu mittuiin a luan huh vek a. Ngawi rengin a en ngai a en tlawk tlawk ringawt a. Tha reng a nei lo bawk.
Thawk-lehkhatah silai a puak dur a, chu silai chu hmundanga puak reng a ni lo; an tualah ngei a ni a puah ni. Tlangval hawk-lak bal zeta nui ri huah huahin a zui a. Silai a puak zui nghal pawp pawp bawk a. Tommy chu ngeiawm zet zetin pawn lam atang chuan an lo chhaih nawmnah a, duhtawk an ngah hnuin sakawr rual tlan thawm a ri tuk tuk a. An kal bo ta.
Tommy chuan khang hote ngei kha an ni; a hmangaih Becky lo khuaikhem tu te chu tih a hrethiam nghal a. Um zui nghal tumin a tho vat a, a tlan thuai a. Mahse, an thuk bul a thlen chuan banglaia a pa thlalak intar a han hmuh chuan a ding chawt a, a la thla ta hial a. A mittui chu a pa thlalakah chuan a far fap fap a, lungchim takin a kuah vawng vawng a. A rilru chhungrilah chuan a pa thuchah hnuhnung kha a lo lang thar leh a. Mittui tla chungin rei fe a thlir leh hnuin in chu a chhuahsan zui ve ta a.
NOT A GATLIN BOYS WAS STANDING
Sakawr chung chuang hmanhmawh baklenga tlan khu rum rum chu bar kawtah a ding chawt a. Sakawr chung chuang chu a tum thla chhak a, bar lam chu a pan chhat chhat a. Bar kawngkhar chu a nam hawng thuai a. Bar chhungah chuan a thinrimna mitmeng hlauhawm tak mai chu a len ruai a. Kil khata thianho zu no dawm, nui hawk hawkte chu a hmu a. An ni pawh chuan an lo thlir thap a, ngeiawm tak hian an lo melh a, an nui sawng a. An ni ngei chu a ni a mi zawn tak te chu. Ding takin an lam pan chuan a kal nghal thuai a. Mahse, an zinga pakhat chu a rawn tho chhuak ve tlat mai le!
A lam panin ke a rawn pen ve nghe nghe a. Bar chhung lai takah chuan an in tawk ta a. An in hmachhawn ta riau mai le! Khuavang kal lai ang maiin bar chhungah chuan thawm reng a chhuak lova. Tu tan mah tawng ngam na chi a ni tlat lo. Dawhkan atanga lo tho chhuak pa chuan, “Tommy, min hmachhawn ngam tak tak dawn em ni? Haw leh zawk la, Becky mamawh hun lai tak i ni zawk awm si a,” ngeiawm zet hian a lo ti a. A nui kawi-sawi vel a.
Tommy chuan ngawi rengin hnuai lam a bih a, muang changin a in her a kawngka lam pan chuan a let leh ta a. Kil khata tlangval zu in ho, Becky khuaikhem tu te ngei chu an nui leh ta hawk hawk a. An vo zam ngei niin an hria a. Vo zam theih mai mai, mi dawihzep “Yellow” tiin an pawr zui em em a, an uang nasa mai a.
Mahse, Tommy erawhin an thawm chu a ngaihsak hauh lo. Kawngka lam panin a kal zel a, a ding eih lo. Chutia Tommy let leh chu bar chhunga awm te chuan an thlir thap a, mak tiin an en a ni. Kil khata tlangval thu te chuan an vo zam ngei niin an hria a, an khawngaih letling hle a. Mahse, Tommy rilru erawh tuman an hre hauh lo! Chutia kawngkhar lam pana Tommy let chhat chhat chu pawnah a chhuak awzawng lo mai! Bar kawngka chu a khar hmak zawk a, a chhung lamah a kalh nghal rap bawk a. An vona chuan chhete mahin a ti zam eih lo a ni. Bar chhunga a bitumte dawhkan lam panin a let phei leh chhat chhat a. Kum 20 chhung hrehawm a lo tawrh tawhna leh a hmangaih Becky tawrhna chu a tawngkhawng tawh a ni. A thinrimna chuan vawr tawp a thleng tawh a, chu chuan hlauh a neihtir thei tlat lo! “Mipa dik tak hi min hmachhawn zawk ta che u, in puakruk phawi ru le” a ti chang fak a. Tlangval ho zu in lai chu an ding suau a; mahse, an hmachhawn chu an hre chiang tlat lo. Tumah rengin puakruk an phawi hman lo, an khel an ban laiin ngenmu a dawng zawk a ni. An tlu thal rem rum hlawm a. Silai puak ri leh Tommy hmelmate bawksawp thawm bak ri dang a awm eih lo. Pakhat chauh a ding ta, chu pa thluak bur zawnah tak chuan Tommy puakruk chu a hawi vang a.
Tommy chuan, “Becky tan” a ti sap a, silai a puak thawt a. Tommy hmelmate chu tumah reng an ding ta lo!
“Ka pa, i thu min chah kha ka la theihnghilh hauh lo asin. I khawvel thim tak ang kha min duhsak pui lo tih ka hria e. Buaina a ta ka inthiar fihlim theih loh vang hian chak lo ta viauah min ngai lo hram rawh aw? Ka pa, min hriatthiam hram ka beisei. A chang chuan mipa kan nih angin buaina chinfel kawngah, kut kan thawh ve a ngai thin,” tiin a phun sap a.
COWARD OF THE COUNTY
Everyone considered him the coward of the county
He’d never stood one single time to prove the county wrong
His mama named him Tommy, but folks just called him yellow
Something always told me they were reading Tommy wrong
He was only ten years old when his daddy died in prison
I looked after Tommy, ‘cause he was my brother’s son
I still recall the final words my brother said to Tommy
“Son, my life is over, but yours has just begun”
“Promise me, son, not to do the things I’ve done
Walk away from trouble if you can
It won’t mean you’re weak if you turn the other cheek
I hope you’re old enough to understand
Son, you don’t have to fight to be a man”
There’s someone for everyone, and Tommy’s love was Becky
In her arms, he didn’t have to prove he was a man
One day while he was working, the Gatlin boys came calling
They took turns at Becky, n’there was three of them
Tommy opened up the door, and saw his Becky crying
The torn dress, the shattered look was more than he could stand
He reached above the fireplace, and took down his daddy’s picture
As the tears fell on his daddy’s face, he heard these words again
“Promise me, son, not to do the things I’ve done
Walk away from trouble if you can
Now, it won’t mean you’re weak if you turn the other cheek
I hope you’re old enough to understand
Son, you don’t have to fight to be a man”
The Gatlin boys just laughed at him when he walked into the barroom
One of them got up and met him halfway ‘cross the floor
When Tommy turned around they said, “hey look, old yeller’s leaving”
But you could’ve heard a pin drop when Tommy stopped and locked the door
Twenty years of crawling was bottled up inside him
He wasn’t holding nothin’ back, he let ‘em have it all
When Tommy left the barroom, not a Gatlin boy was standing
He said, “this one’s for Becky,” as he watched the last one fall
“I promised you, Dad, not to do the things you’ve done
I walk away from trouble when I can
Now please don’t think I’m weak, I didn’t turn the other cheek
And papa, I sure hope you understand
Sometimes you gotta fight when you’re a man”
Everyone considered him the coward of the county
No comments