Ka bula țhu bengchheng tak takte chu intiâm ruâl ang maiin thâwk-lehkhatah an ngawi ta thut a. Mihring ka hriât tawh a zawnga thâwm nâ leh bengchheng ber ni hiala ka lo ngaihte; thâwk-leh-khata an reh ta thut chuan min ti hrilh hai ngei mai! An lam hawia kan thlêk phei nâk chuan, kan lam pana lo kal hmeichhe pakhat hi an thlîr chu lo ni in!
Nihliâp khum pakhat hi a rawn lang a. Chu nu chuan hmanhmawh hran em em lo leh muang lutuk si lo hian ke a rawn pen zâlh zâlh a. Kûn deuh leh nihliâp parh tlângin a hmâi a hliah deuh avang chuan; a hmêl pawh alang țha thei lova. Vanca Jacket dum a ha a, leggings lycra (aka spandex) ațanga siam, dum fai țha tak hi a ha bawk a. A hnung lamah chuan Adidas company chhuak; backpack a ak hnalh hnalh bawk a.
Chu nihliap khum chuan kan țhutna lam chu a rawn pan phei zel a, ka bula țhu te chuan mit tla leklo hian an lo thlîr ve a. Kei tak pawh chu ka thin phu a rang telh telh mai! Eng ang hmel pu nge ni ang tiin ka lo en ngun hle. Ka lo suangtuah dan mai chuan no tak, nu hnâp, ngaihno bei leh meng mâwi zet mai anih kan ring thla rawk a. A lang chin lan dân a fuhin apian a nalh êm a tin ni.
Chutia chil thli tla lo chauha ka thlir reng lai chuan ka bul sir ding lamah chuan a rawn ding ta mai a. A nihliap chu muang changin a dah a, a backpack-ah chuan khung pahin a mobile a phawrh nghal zat a. Phone chu a en zawk a, a nui sêih a, a khung leh mai a. Thâwk la halhin a dár a chhîn âk a, a hawi chhuaka ka lam a lo hawi zawk a, a leh hawi leh daih a. A hmêlțha tak zet a ni.
Duhawmna zawng zawng hi amahah chuan a kim vek mai awm e; tih theih a ni! En mai chuan sêlna tur avâng hle. A nuih sen sen laite chuan khawvêl hi a ngâwi ta emaw tih tur a ni.
Pangpar mawi tak hi ka chan ber! A vunte chu khawthlang nula mal ang maia mâm a ni a, a hmûite chu theirah tuihnâi tak, hmin țha tak si, lawh hlim ang maia thiânghlim a ni.Thawnthu bu kipa achangtunu an sawi ve ziah țhin hi; amah vek alawm tiin sawi sela, awih lohna chhan tur ka haihchham ngawtin ka ring.
Abulah chuan duhthu han sâm leh chuan tur hi avang ngawt awm e! Hlimnate, thlamuânnate leh engthâwlnate hian abulah chuan thla an zâr duh hmêl tak asin!
Nisa rum rût hnuaia thing hlim hmunte hi ka rilru ah alo lang a. Huan mawi tak te, lal in ropui takte nen! Rilru hi a thar sârh a, engkim mai hi an nih tur ang veka awmah ka ruat a. Khawvel hi sualna, inphiarrûkna, eirûkna leh hlemhlêtna hmun mai ani tih ka hre chang lo hial hman!
Ka bula țhu vê te chu ngaihtuah lek lovin, khawvel hi nuam ta riauin ka hria a. Ani tan erawh kawngsira lungte pakhat ve lek ang mai ka ni âwm e te ka ti leh hnu hnawh thul.
Amah chu nulian lam feet 5 leh inches 6 ațanga 7 vel a sâng, ria lam deuh; sam dum tle zet mai hi a ni a. A leggings fai tak chu a Boot ankle-length pâwl ah chuan a bilh lût a. Han en mai pawhin mi in cheng vawng leh vengva tak ni hian a lang na a; thil tam tak hi a landân ang ngawt hi a ni ngai tlat lo a ni.
Chu tia ka thlir reng lai mêk chuan a ni, chu a kut no tak chuan a khaini hmuam chu kawm chhuak tâwkin, a hnung lamah leh-hawi map lovin a pen per vei siah siah ni!
hahaaaaaa tha lutuk
ReplyDeletehahah... A che hit lo khawp mai.
ReplyDelete