Thingpui hi la naupang te ti lo hian ka ngaina ve zek a. Puar taka zanriah han ei a, ka thutthleng hman thiam ngei mai a, muang mara thingpui sen sa hang tha tak mai han khiat khulh khulh hi chuan reithei pa chhete mah ni i la, dam hlut zia hi a takin ka pawh pha ve mai hian ka in hria.
Thingpui hi a that lohna an sawi cham chi a mahse, keimahah hi chuan that lohna em em min thlen pawn ka hre hauh lo. Thingpui heh tak mai hi ka ni ve a, harsatna hi thingpui ka in tak avang hian ka tawng pawhin ka in hre mai lo. Mahse, mi thiam leh chik mi tam tak te zingah pawh thingpui in mihring hriselna a khawih pawi dan an sawiin an ziak teuh mai thin a. Chu tih lai karah chuan, ka hriat ve dan mai mai kan thlasik mau puah pui ve leh phawng phawng mai dawn ni.
Green Tea, Thingpuisen pangngai leh a paw hang emaw thingpui hi taksa hriselna atana thil tha tak a lo reng mai a ni. Thingpuiah hian flavanoids a tam hle a, chu chuan vascular dilation a ti chak a, chu chu lung tan a tha hle a ni. Regular taka thingpui in hian Ischemic Stroke Risk a ti hniam thei ni a sawi a ni.
Polyphenol tam tak Green tea in a pai a, chu chu vun tan a tha a, vuna cell thi tawhte a tinung leh a, chu chuan min ti lang naupang theiin boruak chhia avanga vun natnate pawh a veng thei a ni. Polyphenol hi antioxidant niin cancer risk pawh a tihniam thei niin an sawi bawk.
Green tea leh Black tea-ah te hian litheanine a awm a, chu chu rilru ti hahdam thei niin ngaihtuahna sawrbing tura rilru tichak thei niin an sawi, regular tak a thingpui in hian ha leh ruh/ruh chuktuah hrang hrang a tichak hle bawk. Thingpui hi bawnghnute leh chini tel lo(a sen hang) a in chuan calorie a pai lova, min ti puar tho si a, intih cher tum te tan thingpui in tam hi a pawi lo hle awm e.
Sawi tur a la awm nual awm e, thingpui that lohna te pawh sawi tur a tam hle ang. Engpawh ni se, kei chuan zanriah ei zawha thingpui sen hang sa vel vawl la in zel hi ka la ban san mai ka ring chiah lo.
No comments