AR KAN RU

Tlangval kan han hre tan ve uk uk a, kan han til-pawr-aw vei dut dut a, kan ngeng tan ta nghal riau bawk a. Chuti chuan tlangval nunchan kan zir chho ve a, kan phak tawkah nun kan chhek ve chi-chiai a, ngaihtuah a tawiin lungkham kan nei em em lo bawk a. Nuam kan tih ang chu kan phak tawkah kan um ber a. Hringnun kan hriat chu a zangkhai a, a awlsam em em bawk a. Kan hriat thil kha a tawi a, kan hriat chinah erawh kan lungawi ve hliah hliah a, hriat belh tumna vanga tuihalna kan nei lova, kan nuna thleng kha kan hriat duh a tling tawk em em a. Nuam kan tih loh zawng kha chu kan um zui lo mai a, kan tana tangkai pawh ni se kan peihna in a tlin loh rualin a tulna kan hmu pha lo hrim hrim. A ni, chuti ang nun chu a nuam letling a, a hahdamthlak a ni. A chutih vang chuan a ni, tu te paw’n “Rawllai Nun” kan ngaih thin ni.

Hetih rual hian mihring dai a inchen lova, kan zik chhuah leh chhawr chhuahna in a zir loh chuan damchhung nghawng pawi kan tawhna hun a ni thung.

High School kan rah chhoh hunlai hi rawlthar kan nih intanna hun awm vel a nih ka ring a, thiante nen pawha rualkhai taka kan khawsakho theih hunlai a ni. Ti ti a rual a, pianphungah pawh kan than duh hunlai a nih vangin kan intiah tlang hunlai awm vel ber a ni ang. Ngaihzawng neih kan hriat tan ve hun a ni chho tawh a, at zual a reh tawh a, tlangval hriat chhoh hun a nih avangin nunphung a danglam tan tawh a ni. Hmeichhe bula infiam hurh hurh kan peih lo chho tawh a, tawng tam loh kha nunin pa a tih hunlai a ni tlat a ni. Kan tawng zur zut tawh lova, tul nia kan hriat chauh kan sawi mai a, chu pawh thum dumin leh chhumbung takin kan sawi chher chher thin. Hmeichhe hmel duh zawng kan melh tan a, lehkhathawn ziah kan han ching chho  bawk a. Zaithiam ngaihsan kan han nei a, an hla te chuan kan nunah awmzia kan han neih tir chho ta thin a. A hunlai a ni a, kan khawvel kha a nuam a ni.

Keipawh chu’ng hunah chuan ka nunphung pawh a danglam ve na rawh e. Hostel-a awm thin ka ni a, mipa rual Hostel-a kan han khawsa tehreng chu a nuam thin khawp mai. Nuam tihzawng leh ngainat zawng inang kha kan inkawmngeih zual a, kan inzui ngun bik thin a, kan inpawh bik thin.

Tumkhat chu vai ar kan ru a, chumi tum chuan kan hlim tlang hlawm hle a. A chhan ber ni’a ka hriat chu kan sa rawp inhnangfakna tling a nih vang kha ni berin ka hria. Ni, thanglai chhaw heh rual, Hostel-a khawsa chu a vir theih khawp hi a lo ni.

Kan School hi Thenzawl khua atanga KM-4 vel zet kal a ni a, Central School a niin, Jawahar Navodaya Vidhyalaya (JNV) a ni. Boarding a ni a, kum khatah tum hnih chauh chawlh kan nei ve a, chumi hun chhung chu belhbawmin thla thum awrh a ni ang. Campus a zau tham em em a, bangin a hung chhuak vek a ni.

High School kan han rah chhoh lai tak velah Mizo Principal kan nei ve hlawl a, kan lawm tlang hle a. An chhungkua chu mi changkang tih takah an zau halh mai a, kan nel em em thin a. Principal Quarter hi Dormetary hnaih takah a awm a, Dining Hall kan panna thin kawnga awm a nih avangin kan paltlang nitin thin a. A chang chuan kan chaw ei kham hi an kawtkaiah kan thuchawl fo thin. Tumkhat chu chutia kan thutchawlh lai tak chuan kan Principal te nupa chuan an ral lehlama vai hnathawk inkhuar te’na an ar vulh an thlahdah thu leh, an huanah te hial an lo tlat luh thin fo thu an sawi a. An ning hle a ni tiin an sawi a. Fiamthu ti tihin ‘Vai ho ar hi han perh tlu mai teh u; kan ning zo zai em mai’ an ti a, an nui hawk hawk a. A ni reng lah tak a, ninawm tham hial tur khawpa tam hi an ni hrim hrim a! An tla chhuak sup sup mai thin a ni.

Chutia Principal te nupa meuhina kan kianga chutiang thu an han sawi chu kan lawmah a tla a, kan insawiphura kan ri ta hlut mai a. Sa rawp lai lo ni bawk nen, kan ti ti ber a tling ta hial reng a ni. Tichuan ro kan rel ve nak nak ta hlawm a, thianhovin rem kan ruat ta hial a. Chuta kan thu rel chu hei hi a ni a - remchang hmasa bera vai ar ru tura thawhchhuah a ni. Tichuan, hun remchang kan nei thei ta a.

Kan remruat ni a lo thlen chuan kan phur tlang hle a, kan tum danah chuan zan reh laia chet lak a ni. Tichuan, midangte mut hun kan nghak ta a, chhuak tura kan inpeih hman meuh chuan 11 PM a tling thawthang tawh a. Thawmhnaw lian pui pui hi kan ha hlawm a, kan pianphunga min hriat chian theih loh nan a ni ber. A duhthawh zualte chuan NCC pheikhawt char zet zet hi kan bun lawk bur hlawm a, a na thei ang bera chet lak tum kan ni ber. Pali atanga panga bawr vel emaw kan niin ka hria; ka chiang ta chiah lo. Khang hunlaia kan ding khup tur vel kha ka’n mitthla hian ka nui chhuak leh phut thin.

Tichuan kan chhuak tham tham ta hlawm a. Vaiho chu kan ep muala buk sa an ni a, kan karah kawr a awm a. Kawr kan pan thlak lam chuan kal pangngaiin kan la kal a., kawr kan pelha kawng chho kan zawh chu kan bawkvak hi a ni ber tawh a. Thawm dim tak leh fimkhur em emin kan ral veh phei hi a ni ber. Kan han chuang chhuah chuan kan fimkur zual leh em em a, di phenah kan kun phei dun dun a, kan thleng ta a. Buk pawnah chuan ngawi rengin kan ding tham ta hlawm a, thawm kan dim lehzual kher mai! Vai ho lah chu an lo mutui em em mai a, zawng kah tlak ang chauh hi an ni a. Kan thawm hria reng an lo awm lo va, an lo mu kual ruih mai zawk a.

Thawk-leh-khatah kan thian pakhat chuan kawngkhar chu an hawng thuai a, kun ngalin kawngka zawnah tak chuan a ding kak tau a. A kawr hak a lian tham bawk a, hlauhawm tak tur hi a ni. Mahse chuti khawp thawmah pawh chuan tumah an rawn tho chhuak hauh lo. Che eih pawh hi awm lo niin ka hria. Chulai tak chuan an kawta ar in chu duhtawkin kan dap a, pahnih nge ni a, pathum ka chiang ta lo va, chutiang zah vel tur ang chu ar kan khai chhuak ta a. Chutianga duhtawk mai lo chuan vaiho buk chhungah kan lut zui dial a, duh tawka ringin kan pheikhawk char zet bun chu chhuatah kan han per tak tak mai a. Dim lo bak sakin rei tawk fang chhuat kan per hnu chuan kan duhtawk a, kan chhuak zui nghal a. Nuih za si, insum siin kan chhuak a ni ber. Kan nuih tiza em em tu ber chu – tumah che-chang ngam an awm hauh lo kha a ni. Thawm kan dim loh tehreng nen tho chhuak pakhat te mah an awm lo. 

Tichuan baklengin Dorm lam panin kan tlan tuk tuk a, Dorm kan han thleng chu kan hlim tlang dar dar hle a. A la tlai chhiat loh avangin ar chu kan buaipui nghal sat sat a, tualah mei chhepin kan kang ta sar sar a. Nuam kan ti tlang hlawm khawpin ka hria. Zan chu kan men hrep mai a, kan puarin kan tlai hneh ngei mai. Zan tlai a nih tawh avangin chaw han lam tur awm hek lo, a hlangin kan lim tlang ngheng mai a. Duhai erawhin telin a hneh lam hret a ni a, a mawm thla hlap hlap ngei mai!

Complaint luh thu chu kan ral hriat a, Principal erawhin chung thil avang chuan min ko hauh lo va. A hlimchhawnah chuan kan kawngkal ina Principal kan hmuh chang chuan a nui ve suk thin.